യു.എസ്. സർക്കാരിന്റെ നിയമനിർമാണ നിർദേശങ്ങൾ പ്രസിദ്ധീകരിക്കുന്ന ഔദ്യോഗിക വെബ്സൈറ്റായ ‘ഫെഡറൽ രജിസ്റ്ററിൽ’ ചൈനീസ് എഐ മോഡൽ ഉപയോഗിച്ചത് വിവാദമായി. ചൈനീസ് കമ്പനിയായ ആലിബാബയുടെ ‘ക്വെൻ’ (Qwen) എന്ന എഐ മോഡലാണ് നാഷണൽ ആർക്കൈവ്സ് നടത്തുന്ന ഈ വെബ്സൈറ്റിൽ സെർച്ച് ടൂളായി വിന്യസിച്ചിരുന്നത്.
പൊതുജനങ്ങൾ സമർപ്പിച്ച അഭിപ്രായങ്ങൾ പരിശോധിക്കാൻ ഉപയോഗിച്ചിരുന്ന ഈ സൗകര്യം, സോഷ്യൽ മീഡിയയിൽ വിവരങ്ങൾ പ്രചരിച്ചതിനെ തുടർന്ന് നീക്കം ചെയ്തു. അമേരിക്കൻ എഐ കമ്പനിയായ ആന്ത്രോപിക്കിന്റെ സാങ്കേതികവിദ്യ ആലിബാബ മോഷ്ടിച്ചുവെന്ന് കഴിഞ്ഞയാഴ്ച എഫ്.ബി.ഐ ആരോപിച്ചതിന് പിന്നാലെയാണ് സർക്കാർ ഏജൻസിയുടെ ഈ നടപടി.
ആലിബാബയുടെ ക്വെൻ ഒരു ഓപ്പൺ-വെയ്റ്റ് മോഡലായതിനാൽ കുറഞ്ഞ ചെലവിൽ ഉപയോഗിക്കാൻ സാധിക്കുമെങ്കിലും, ചൈനീസ് എഐ സാങ്കേതികവിദ്യകളോട് കടുത്ത എതിർപ്പ് പ്രകടിപ്പിക്കുന്ന യു.എസ് സർക്കാരിന്റെ തന്നെ ഭാഗത്തുനിന്നുണ്ടായ ഈ നീക്കം വലിയ വൈരുധ്യമാണെന്ന് വിദഗ്ദ്ധർ ചൂണ്ടിക്കാണിക്കുന്നു. ചൈനീസ് എഐ ടൂളുകൾ ഉണ്ടാക്കുന്ന ദേശീയസുരക്ഷാ ഭീഷണികളെക്കുറിച്ച് യു.എസ്. ജനപ്രതിനിധിസഭ അന്വേഷണം നടത്തിവരികയാണ്.
Be the first to comment