ഡോ. ജോര്‍ജ് എം. കാക്കനാട്
ഹൂസ്റ്റണ്‍: നവംബറില്‍ നടക്കാനിരിക്കുന്ന ഇടക്കാല തെരഞ്ഞെടുപ്പില്‍ റിപ്പബ്ലിക്കന്‍ പാര്‍ട്ടി വന്‍ തിരിച്ചടി നേരിടുമെന്ന ഭയത്താല്‍, ഇറാനുമായുള്ള യുദ്ധം കൂടുതല്‍ തീവ്രമാക്കാതെ തത്കാലം ശാന്തമായി മുന്നോട്ടുകൊണ്ടുപോകാന്‍ അമേരിക്കന്‍ പ്രസിഡന്റ് ഡൊണാള്‍ഡ് ട്രംപിന്റെ മുതിര്‍ന്ന ഉപദേശകര്‍ സമ്മര്‍ദ്ദം ചെലുത്തുന്നതായി റിപ്പോര്‍ട്ട്. തെരഞ്ഞെടുപ്പില്‍ പാര്‍ട്ടിയുടെ വോട്ട് ചോര്‍ച്ച തടയാന്‍ ലക്ഷ്യമിട്ടാണ് ഈ നീക്കം. വൈറ്റ് ഹൗസിലെ ആഭ്യന്തര ചര്‍ച്ചകളെക്കുറിച്ച് അറിവുള്ള നാല്‍പ്പതോളം പ്രമുഖരെ ഉദ്ധരിച്ചാണ് വാര്‍ത്താ ഏജന്‍സിയായ റോയിട്ടേഴ്‌സ് വിവരങ്ങള്‍ പുറത്തുവിട്ടത്.
നവംബര്‍ 3-ലെ വോട്ടെടുപ്പിന് ശേഷമേ സൈനിക നടപടികള്‍ ശക്തമാക്കുന്നതിനെക്കുറിച്ച് വൈറ്റ് ഹൗസ് ഉദ്യോഗസ്ഥര്‍ ആലോചിക്കുകയുള്ളൂ എന്ന് ഇതുമായി ബന്ധപ്പെട്ട കേന്ദ്രങ്ങള്‍ വ്യക്തമാക്കുന്നു. പ്രതിരോധ സേനയുടെ നീക്കങ്ങളേക്കാള്‍ ഇറാനെ സാമ്പത്തികമായി തളര്‍ത്തുന്നതിനാണ് ഭരണകൂടം ഇപ്പോള്‍ മുന്‍ഗണന നല്‍കുന്നത്. മുന്‍ മാസങ്ങളില്‍ നടത്തിയ സൈനിക ആക്രമണങ്ങളിലൂടെ നേടിയെടുക്കാന്‍ സാധിക്കാത്ത വിട്ടുവീഴ്ചകള്‍ ഭാവി ചര്‍ച്ചകളില്‍ ഇറാനില്‍ നിന്ന് നേടിയെടുക്കുകയാണ് ലക്ഷ്യം.
ഇറാനുമേലുള്ള സമ്മര്‍ദ്ദം തുടരുമെങ്കിലും നവംബറിലെ തെരഞ്ഞെടുപ്പിനാണ് ഇപ്പോള്‍ മുന്‍ഗണനയെന്ന് ഒരു വൈറ്റ് ഹൗസ് ഉദ്യോഗസ്ഥന്‍ വ്യക്തമാക്കി. യുദ്ധം വലിയ തോതില്‍ ബാധിക്കാതെ നിര്‍ത്തിക്കൊണ്ടുപോകുന്നത് തെരഞ്ഞെടുപ്പ് പ്രചാരണ വേളയില്‍ വിഷയം പ്രധാന ചര്‍ച്ചയാകുന്നത് തടയാന്‍ സഹായിക്കും. ജനങ്ങള്‍ക്കിടയില്‍ അതൃപ്തിയുണ്ടാക്കിയ ഈ യുദ്ധം വാര്‍ത്തകളില്‍ നിറഞ്ഞുനില്‍ക്കുന്നത് സെനറ്റിലും ജനപ്രതിനിധി സഭയിലും റിപ്പബ്ലിക്കന്‍ പാര്‍ട്ടിക്കുള്ള നേരിയ ഭൂരിപക്ഷത്തെ ബാധിക്കുമെന്നാണ് വിലയിരുത്തല്‍.
ഓഗസ്റ്റ് അവസാനത്തോടെ പുറത്തുവന്ന സര്‍വേ പ്രകാരം വെറും 31 ശതമാനം അമേരിക്കക്കാര്‍ മാത്രമാണ് യുദ്ധത്തെ പിന്തുണയ്ക്കുന്നത്. ഉയര്‍ന്ന ഇന്ധനവില ജനങ്ങള്‍ക്കിടയിലെ അമര്‍ഷത്തിന് ആക്കം കൂട്ടിയിട്ടുണ്ട്. യുദ്ധത്തിന് താത്കാലികമായി വേഗത കുറയ്ക്കുന്നത് അമേരിക്കന്‍ സൈന്യത്തിന് ആശ്വാസമാകുമെന്നും കരുതപ്പെടുന്നു. ദീര്‍ഘകാലമായി തുടരുന്ന പോരാട്ടങ്ങള്‍ മൂലം യു.എസ് സൈന്യത്തിന്റെ ആയുധശേഖരത്തില്‍ വലിയ കുറവുണ്ടായിട്ടുണ്ട്.
ആയുധശേഖരം പുനഃസ്ഥാപിക്കാന്‍ ഇത് സമയം നല്‍കുമെന്നാണ് സൈനിക വൃത്തങ്ങളുടെ കണക്കുകൂട്ടല്‍. കൂടാതെ, മേഖലയിലെ അമേരിക്കന്‍ സഖ്യരാജ്യങ്ങളും തിരിച്ചടികള്‍ ഒഴിവാക്കാന്‍ വൈറ്റ് ഹൗസിനോട് ആവശ്യപ്പെട്ടിട്ടുണ്ട്. എന്നാല്‍, യുദ്ധം ശാന്തമായി മുന്നോട്ടുകൊണ്ടുപോകുക എന്നത് അമേരിക്കയ്ക്ക് അത്ര എളുപ്പമാകില്ലെന്നാണ് രാഷ്ട്രീയ നിരീക്ഷകര്‍ കരുതുന്നത്.
ഹോര്‍മൂസ് കടലിടുക്കില്‍ അമേരിക്കയ്ക്കുള്ള സൈനിക താവളങ്ങള്‍, കപ്പലുകള്‍, മറ്റ് നിര്‍ണായക കേന്ദ്രങ്ങള്‍ എന്നിവയ്ക്ക് നേരെ ഇറാന്‍ ഇടയ്ക്കിടെ ആക്രമണം നടത്താന്‍ സാധ്യതയേറെയാണ്. ഇറാന്‍ തിരിച്ചടി തുടരുകയാണെങ്കില്‍ അമേരിക്കയ്ക്കും ശക്തമായി പ്രതികരിക്കേണ്ടി വരും. ഇത് വൈറ്റ് ഹൗസിന്റെ ആഗ്രഹങ്ങള്‍ക്ക് എതിരായി യുദ്ധം വീണ്ടും രൂക്ഷമാകാന്‍ ഇടയാക്കിയേക്കാം.
വൈസ് പ്രസിഡന്റ് ജെ.ഡി. വാന്‍സ്, സ്റ്റേറ്റ് സെക്രട്ടറി മാര്‍ക്കോ റൂബിയോ എന്നിവരുള്‍പ്പെടെയുള്ള ട്രംപിന്റെ മുന്‍നിര ഉപദേശകര്‍ ഇറാന്‍ വിഷയം നവംബര്‍ വരെ ശാന്തമായി സൂക്ഷിക്കുക എന്ന നയത്തോട് യോജിക്കുന്നുണ്ട്. അതിനാല്‍ നേരിട്ടുള്ള ആക്രമണങ്ങള്‍ക്ക് പകരം ഉപരോധങ്ങള്‍ കര്‍ശനമാക്കാനാണ് നീക്കം. ഇറാന്റെ എണ്ണക്കപ്പലുകള്‍ ഉപരോധിക്കുന്നതിനൊപ്പം ഇറാനുമായി വ്യാപാര ബന്ധത്തില്‍ ഏര്‍പ്പെടുന്ന രാജ്യങ്ങള്‍ക്ക് ഉപരോധം ഏര്‍പ്പെടുത്തുമെന്ന് അമേരിക്ക മുന്നറിയിപ്പ് നല്‍കിയിട്ടുണ്ട്.
വരാനിരിക്കുന്ന തെരഞ്ഞെടുപ്പുകള്‍ തന്റെ ഇറാന്‍ നയത്തെ സ്വാധീനിക്കുന്നില്ലെന്ന് പ്രസിഡന്റ് ട്രംപ് പരസ്യമായി അവകാശപ്പെടുന്നുണ്ടെങ്കിലും, ഏഴാം മാസത്തിലേക്ക് കടക്കുന്ന യുദ്ധം ഭരണകൂടത്തെ രാഷ്ട്രീയമായും പ്രായോഗികമായും പ്രതിസന്ധിയിലാക്കിയിട്ടുണ്ട്. തങ്ങളുടെ ന്യായമായ നീക്കങ്ങള്‍ക്ക് ഇറാന്‍ തിരിച്ചടി നല്‍കിയാല്‍ അവര്‍ക്ക് കൂടുതല്‍ ശക്തമായ ആക്രമണം നേരിടേണ്ടി വരുമെന്ന് ട്രംപ് തന്റെ സോഷ്യല്‍ മീഡിയ പ്ലാറ്റ്ഫോമായ ട്രൂത്ത് സോഷ്യലില്‍ മുന്നറിയിപ്പ് നല്‍കിയിരുന്നു.
Be the first to comment