എട്ട് പ്രധാന നഗരങ്ങളിൽ വീട്ടുപടിക്കൽ പാർസൽ ശേഖരണവും വിതരണവും (ഡോർ ടു ഡോർ) ആരംഭിക്കാനൊരുങ്ങി ഇന്ത്യൻ റെയിൽവേ. പരീക്ഷണാടിസ്ഥാനത്തിൽ നടപ്പാക്കിയ പദ്ധതിയുടെ വിജയം കണക്കിലെടുത്താണ് തീരുമാനം. ‘ഘർ സേ ഘർ തക്’ എന്നു പേരിട്ടിരിക്കുന്ന പദ്ധതിയിലൂടെ ഉപയോക്താക്കൾക്ക് വീടുകളിൽനിന്ന് പാർസലുകൾ അയയ്ക്കാനും ലക്ഷ്യസ്ഥാനത്ത് എത്തിക്കാനും സൗകര്യമൊരുങ്ങും. റെയിൽ പാർസൽ ആപ്പ് വഴിയായിരിക്കും സേവനം ബുക്ക് ചെയ്യേണ്ടത്.
ആദ്യഘട്ടത്തിൽ ഡൽഹി, മുംബൈ, കൊൽക്കത്ത, ചെന്നൈ, അഹമ്മദാബാദ്, ഹൈദരാബാദ്, ബെംഗളൂരു, പൂനെ എന്നീ നഗരങ്ങളിലാണ് പദ്ധതി നടപ്പാക്കുക.
പുതിയ സംവിധാനമനുസരിച്ച് പാർസലുകൾ അയയ്ക്കുന്നതിനോ സ്വീകരിക്കുന്നതിനോ റെയിൽവേ സ്റ്റേഷനുകളിലെ പാർസൽ ഓഫീസുകളിലെത്തേണ്ടതില്ല. ആപ്പ് വഴിയോ വെബ്സൈറ്റ് വഴിയോ വീട്ടുപടിക്കൽനിന്നുള്ള ശേഖരണവും വിലാസത്തിൽ എത്തിച്ചുനൽകുന്നതിനുള്ള സൗകര്യവും മുൻകൂട്ടി ബുക്ക് ചെയ്യാം.
എങ്ങനെയാണ് പാർസൽ സേവനം പ്രവർത്തിക്കുക?
പദ്ധതിയുടെ നടത്തിപ്പിനായി ഇന്ത്യൻ റെയിൽവേ വിവിധ ചരക്കുനീക്ക സേവനദാതാക്കളുമായി സഹകരിക്കും. നഗരങ്ങൾക്കിടയിൽ പാർസലുകൾ ട്രെയിനിൽ എത്തിക്കുന്ന ചുമതല റെയിൽവേയ്ക്കായിരിക്കും. ഉപയോക്താക്കളിൽനിന്ന് പാർസലുകൾ ശേഖരിച്ച് റെയിൽവേ ജീവനക്കാർക്ക് കൈമാറുന്നതും ലക്ഷ്യസ്ഥാനത്ത് എത്തിച്ച് നൽകുന്നതും സേവനദാതാക്കളായിരിക്കും നിർവഹിക്കുക.
ട്രെയിൻ പുറപ്പെടുന്നതിന് 15 ദിവസം മുമ്പ് മുതൽ പുറപ്പെടുന്നതിന് ഒരു ദിവസം മുമ്പ് വരെയുള്ള സമയത്ത് ഉപയോക്താക്കൾക്ക് പാർസൽ ബുക്ക് ചെയ്യാം. ബുക്ക് ചെയ്ത പാർസലുകൾ സേവനദാതാക്കൾ ശേഖരിച്ച് ട്രെയിൻ പുറപ്പെടുന്നതിന് ഒരു മണിക്കൂർ മുമ്പെങ്കിലും റെയിൽവേ അധികൃതർക്ക് കൈമാറും.
ഓൺലൈൻ ബുക്കിങ്ങും തത്സമയ നിരീക്ഷണവും
റെയിൽ പാർസൽ ആപ്പ് വഴി പാർസൽ ബുക്ക് ചെയ്യുന്നതിനും പണമടയ്ക്കുന്നതിനും അയച്ച സാധനങ്ങളുടെ നീക്കം തത്സമയം നിരീക്ഷിക്കുന്നതിനും സൗകര്യമുണ്ടാകും.
ഓരോ ബുക്കിങ്ങിനും പത്തക്ക പ്രോഗ്രസീവ് റഫറൻസ് റെക്കോർഡ് (PRR) നമ്പർ അനുവദിക്കും. ഈ നമ്പർ ഉപയോഗിച്ച് ഉപയോക്താക്കൾക്ക് പാർസലിന്റെ നിലവിലെ സ്ഥിതി പരിശോധിക്കാം. ഡിജിറ്റൽ ജിഎസ്ടി ഇൻവോയ്സുകളും തത്സമയ വിവരങ്ങളും പ്ലാറ്റ്ഫോം വഴി ലഭ്യമാക്കും.
പാർസൽ കൈമാറുന്നതും സ്വീകരിക്കുന്നതും ഒറ്റത്തവണ പാസ്‌വേഡ് (OTP) ഉപയോഗിച്ച് സ്ഥിരീകരിക്കും. യുപിഐ, ക്രെഡിറ്റ് കാർഡ്, ഡെബിറ്റ് കാർഡ്, നെറ്റ് ബാങ്കിങ് എന്നിവയിലൂടെ പണമടയ്ക്കാനും സൗകര്യമുണ്ടാകും.
റദ്ദാക്കലിനും പണം തിരിച്ചുനൽകുന്നതിനും പ്രത്യേക വ്യവസ്ഥകൾ
പാർസൽ ശേഖരിക്കുന്നതിന് മുമ്പ് റെയിൽവേ ചരക്ക് ബുക്കിങ് റദ്ദാക്കുന്നവർക്ക് 10 രൂപ ക്ലർക്കേജ് ചാർജ് ഈടാക്കിയശേഷം റെയിൽവേ ചരക്ക് നിരക്കിന്റെ ബാക്കി തുക പൂർണമായി തിരികെ ലഭിക്കും.
എന്നാൽ, വീട്ടുപടിക്കൽനിന്നുള്ള പാർസൽ ശേഖരണത്തിനും വിലാസത്തിൽ എത്തിച്ചുനൽകുന്നതിനും ഈടാക്കുന്ന തുകയുടെ റീഫണ്ട് അതത് ചരക്കുനീക്ക സേവനദാതാക്കളുടെ നിബന്ധനകൾക്ക് വിധേയമായിരിക്കും.
നഗരങ്ങൾക്കിടയിൽ പതിവായി പാർസലുകൾ അയയ്ക്കുന്ന വ്യക്തികൾക്കും ചെറുകിട സംരംഭകർക്കും ഓൺലൈൻ വ്യാപാരികൾക്കും പുതിയ സേവനം ഏറെ പ്രയോജനപ്പെടുമെന്നാണ് പ്രതീക്ഷിക്കുന്നത്.
റെയിൽവേയുടെ ചരക്കുനീക്ക സംവിധാനത്തെ വീട്ടുപടിക്കൽ സേവനവുമായി ബന്ധിപ്പിക്കുന്നതിലൂടെ പാർസൽ അയയ്ക്കൽ കൂടുതൽ ലളിതവും സൗകര്യപ്രദവുമാക്കുകയാണ് പദ്ധതിയുടെ ലക്ഷ്യം. ഇതോടെ പാർസലുകൾ അയയ്ക്കുന്നതിനും സ്വീകരിക്കുന്നതിനുമായി ഉപയോക്താക്കൾ റെയിൽവേ സ്റ്റേഷനുകളിലെത്തേണ്ട സാഹചര്യം ഒഴിവാക്കാനാകും.
Be the first to comment