ബംഗാൾ ഉൾക്കടലിൽ രൂപപ്പെട്ട ‘മുറസു’ തീവ്ര ചുഴലിക്കാറ്റായി മാറി. നിലവിൽ തമിഴ്നാട് തലസ്ഥാനമായ ചെന്നൈയിൽ നിന്ന് 260 കിലോമീറ്റർ അകലെയാണ് ഈ ചുഴലിക്കാറ്റിൻ്റെ സ്ഥാനം. രാത്രി 11.30-നും പുലർച്ചെ 4-നും ഇടയിൽ ഈ ചുഴലിക്കാറ്റ് ആന്ധ്രപ്രദേശിൽ കരതൊടും. 100 മുതൽ 110 കിലോമീറ്റർ വരെ വേഗത്തിലായിരിക്കും അതിശക്തമായ ഈ കാറ്റ് കരതൊടുക. ഇതോടെ ആന്ധ്രയിലെ നെല്ലൂർ-നരസാപുരം തീരം അതീവ ജാഗ്രതയിലാണ്.
കാറ്റ് കരതൊടുമെന്ന് പ്രതീക്ഷിക്കുന്ന പ്രദേശങ്ങളിൽ ദേശീയ ദുരന്തനിവാരണ സേനയുടെ പ്രത്യേക സംഘം ഇതിനോടകം ക്യാമ്പ് ചെയ്യുന്നുണ്ട്. തീരപ്രദേശങ്ങളിൽ താമസിക്കുന്ന ആളുകളെ ദുരിതാശ്വാസ ക്യാമ്പുകളിലേക്ക് മാറ്റിപ്പാർപ്പിച്ചിട്ടുണ്ട്.
ചുഴലിക്കാറ്റ് കരതൊടുമ്പോഴുണ്ടാകുന്ന വലിയ നാശനഷ്ടങ്ങൾ നേരിടാൻ തമിഴ്നാട്ടിലെ വൈദ്യുതിവകുപ്പ് ജീവനക്കാരെ അടിയന്തരമായി ആന്ധ്രയിലേക്ക് അയക്കാൻ തീരുമാനമായി. ആന്ധ്രപ്രദേശ് മുഖ്യമന്ത്രി എൻ ചന്ദ്രബാബു നായിഡുവും തമിഴ്നാട് മുഖ്യമന്ത്രി വിജയ്യും നടത്തിയ ഫോൺ സംഭാഷണത്തിലാണ് തീരുമാനമെടുത്തത്.
മുറസു ചുഴലിക്കാറ്റിൻ്റെ സ്വാധീനഫലമായി തമിഴ്നാട്ടിലും കനത്ത മഴ മുന്നറിയിപ്പുണ്ട്. ചെന്നൈയിലും തിരുവള്ളൂരും ശക്തമായ മഴയുണ്ടാകും. ഇതിനുപുറമെ കാഞ്ചീപുരം, ചെങ്കൽപേട്ട്, റാണിപ്പേട്ട്, വെല്ലൂർ, നീലഗിരി എന്നീ 5 ജില്ലകളിലും കാലാവസ്ഥാ വകുപ്പ് മഴ മുന്നറിയിപ്പ് നൽകിയിട്ടുണ്ട്. അതിജാഗ്രതയുടെ ഭാഗമായി വരുന്ന ബുധനാഴ്ച രാവിലെ വരെ തമിഴ്നാട് തീരത്ത് മത്സ്യബന്ധനത്തിന് നിരോധനം ഏർപ്പെടുത്തിയതായി സർക്കാർ അറിയിച്ചു.
മഴയും കാറ്റും ശക്തമാകാൻ സാധ്യതയുള്ളതിനാൽ അതീവ ജാഗ്രത പാലിക്കാൻ 7 വടക്കൻ ജില്ലകളിലെ കളക്ടർമാർക്ക് സർക്കാർ അടിയന്തര നിർദേശം നൽകിയിട്ടുണ്ട്. താഴ്ന്ന പ്രദേശങ്ങളിൽ വെള്ളം കയറാൻ സാധ്യതയുള്ളതിനാൽ പൊതുജനങ്ങൾ അത്യാവശ്യമില്ലാത്ത രാത്രികാല യാത്രകൾ പൂർണമായും ഒഴിവാക്കണമെന്നും സുരക്ഷാ ഉദ്യോഗസ്ഥർ കർശന നിർദേശം നൽകി.
Be the first to comment