അന്താരാഷ്ട്ര ഫുട്ബോളിൽ നിന്ന് വിരമിക്കൽ പ്രഖ്യാപിച്ച ഇതിഹാസ താരം ലയണൽ മെസ്സിക്ക് അപൂർവ്വ ആദരമൊരുക്കാൻ അർജന്റീന ഫുട്‌ബോൾ അസോസിയേഷൻ (AFA). രാജ്യത്ത് നടക്കാനിരിക്കുന്ന എല്ലാ വിഭാഗം ഫുട്‌ബോൾ മത്സരങ്ങളുടെയും പത്താം മിനിറ്റിൽ കളി ഒരു മിനിറ്റ് നേരത്തേക്ക് നിർത്തിവെച്ച് താരത്തിന് കൈയടികളോടെ ആദരവർപ്പിക്കും. മെസ്സി ദേശീയ ടീമിൽ അണിഞ്ഞിരുന്ന പത്താം നമ്പർ ജേഴ്‌സിയെ സ്മരിച്ചുകൊണ്ടാണ് പത്താം മിനിറ്റ് ഇതിനായി തിരഞ്ഞെടുത്തത്.
വരാനിരിക്കുന്ന വാരാന്ത്യത്തിൽ നടക്കുന്ന പുരുഷ-വനിതാ സീനിയർ മത്സരങ്ങൾ, ഫുട്‌സാൽ, ബീച്ച് സോക്കർ തുടങ്ങിയ എല്ലാ ഔദ്യോഗിക മത്സരങ്ങളിലും റഫറിമാർ പത്താം മിനിറ്റിൽ കളി നിർത്തിവെക്കും. ഈ സമയം കളിക്കാരും ഗാലറിയിലുള്ള കാണികളും ചേർന്ന് ഒരു മിനിറ്റ് നേരം പൊതുവായി കൈയടിച്ച് മെസ്സിയുടെ കരിയറിന് ആദരമർപ്പിക്കും. കൂടാതെ സ്റ്റേഡിയങ്ങളിലെ ബിഗ് സ്‌ക്രീനുകളിൽ മെസ്സിയുടെ കരിയറിലെ മികച്ച നിമിഷങ്ങൾ കോർത്തിണക്കിയ പ്രത്യേക വീഡിയോയും പ്രദർശിപ്പിക്കും.
അതിനിടെ, മെസ്സിയുടെ വിരമിക്കൽ ദേശീയ ടീമിന് കനത്ത നഷ്ടമാണെന്ന് അർജന്റീന പ്രസിഡന്റ് ഹാവിയർ മിലെയ് പ്രതികരിച്ചു. തീരുമാനം വ്യക്തിഗതമായി മനസ്സിലാക്കാവുന്നതാണെങ്കിലും അർജന്റീന ഫുട്‌ബോളിനെ സംബന്ധിച്ച് ഇത് വലിയൊരു വെല്ലുവിളിയാണെന്ന് അദ്ദേഹം കൂട്ടിച്ചേർത്തു.
Be the first to comment