കാഠ്മണ്ഡു: നേപ്പാളിനെ തകർത്തെറിഞ്ഞ പ്രളയദുരന്തം നടന്ന് ഒരാഴ്ചയായിട്ടും രക്ഷാപ്രവർത്തനം തുടരുന്നു. ദുരന്തഭൂമിയിൽനിന്നു കരളലിയിക്കുന്ന നിരവധി വാർത്തകളാണ് വരുന്നത്. നുവാക്കോട്ട് ജില്ലയിലെ ബിദൂർ മുനിസിപ്പാലിറ്റിയിൽപ്പെട്ട പത്താം വാർഡിലെ ബെത്രാവതി പ്രദേശത്തു പ്രളയാവശിഷ്‌ടങ്ങൾക്കടിയിൽ പൂർണമായി പൂണ്ടുപോയ ഒരു വീടിനുള്ളിൽനിന്ന് ഇന്നു രാവിലെ 23 മൃതദേഹങ്ങൾ കണ്ടെടുത്തു.
പ്രളയം ആഞ്ഞടിച്ച സമയം രക്ഷപ്പെടാനായി ഇവർ ഈ വീടിനുള്ളിൽ അഭയം പ്രാപിച്ചതാകാമെന്നാണ് അധികൃതരുടെ നിഗമനം. എന്നാൽ നിമിഷങ്ങൾക്കകം പ്രളയത്തോടൊപ്പം ഒഴുകിയെത്തിയ കൂറ്റൻ പാറക്കല്ലുകളും ചെളിയും വീടിനു മുകളിലേക്ക് പതിക്കുകയായിരുന്നു. ഇന്നലെ ഇവിടെത്തന്നെയുള്ള ഒരു വീട്ടിൽനിന്ന് ആറു മൃതദേഹങ്ങൾ വീണ്ടെടുത്തിരുന്നു. ബാക്കിയുള്ള മൃതദേഹങ്ങൾ ചൊവ്വാഴ്ചയാണ് പുറത്തെടുത്തത്. കൂടുതൽ മൃതദേഹങ്ങൾ അവശിഷ്‌ടങ്ങൾക്കടിയിലുണ്ടോ എന്ന സംശയത്തിൽ തെരച്ചിൽ ശക്തമായി തുടരുകയാണ്.
കാണാതായ പ്രിയപ്പെട്ടവരെ തിരഞ്ഞ് ആശുപത്രികളിൽ ബന്ധുക്കളുടെ വൻ തിരക്കാണ് അനുഭവപ്പെടുന്നത്. കണ്ടെടുത്ത മൃതദേഹങ്ങൾ പലതും ജീർണിച്ച നിലയിലായതിനാൽ തിരിച്ചറിയാൻ ഏറെ പ്രയാസ നേരിടുന്നുണ്ട്. ഫോറൻസിക് പരിശോധനകളിലൂടെയും ഡിഎൻഎ കിറ്റുകൾ ഉപയോഗിച്ചുമാണ് വ്യക്തിവിവരങ്ങൾ സ്ഥിരീകരിക്കുക. ഇന്ത്യയിൽനിന്നുള്ള 18 ഫോറൻസിക് വിദഗ്ധർ ഇതിനായി നേപ്പാളിൽ എത്തിയിട്ടുണ്ട്. പലയിടത്തും മൃതദേഹങ്ങൾ കൂട്ടത്തോടെ സംസ്കരിക്കുന്നുണ്ട്.
അതേസമയം, നേപ്പാളിൽ കഴിഞ്ഞ ബുധനാഴ്ചയുണ്ടായ മിന്നൽപ്രളയത്തിലും ഉരുൾപൊട്ടലിലും മരിച്ചവരുടെ എണ്ണം ആയിരത്തിലേക്ക് അടുക്കുകയാണ്. ആകെ റിപ്പോർട്ട് ചെയ്ത 987 മരണങ്ങളിൽ ഏറ്റവും കൂടുതൽ ആളുകൾ മരിച്ചത് ചിത്വാൻ ജില്ലയിലാണ്-321 പേർ. നവൽപരാസി ഈസ്റ്റ് (216), നവൽപരാസി വെസ്റ്റ് (170), നുവാക്കോട്ട് (95), ഗോർഖ (65), ധാഡിംഗ് (55), രസുവ (27) എന്നിവയാണ് കൂടുതൽ മരണങ്ങൾ റിപ്പോർട്ട് ചെയ്യപ്പെട്ട മറ്റു ജില്ലകൾ. 4,000ത്തോളം പേരെ ഇനിയും കണ്ടെത്താനുണ്ട്.
Be the first to comment