കോക്രോച്ച് ജനതാ പാർട്ടിയെ നേരിടാൻ അയാൻ ഭട്നാഗറിൻ്റെ ലാൽ ഹിറ്റ് ജനതാ പാർട്ടി

അടുത്തിടെ രൂപീകരിക്കപ്പെട്ട കോക്രോച്ച് ജനതാ പാർട്ടിയെ (സിജെപി) നേരിടാൻ പുതിയ സംഘടനയുമായി ഒരു സംഘം രംഗത്ത്. ‘ലാൽ ഹിറ്റ് ജനതാ പാർട്ടി’ എന്നാണ് പുതിയ സംഘടനയ്ക്ക് പേരിട്ടിരിക്കുന്നത്. അയാൻ ഭട്നാഗർ എന്നയാളുടെ നേതൃത്വത്തിലാണ് സിജെപിക്ക് മറുപടിയുമായി ഒരു വിഭാഗം അണിനിരക്കുന്നത്. ‘പാറ്റകളുള്ളിടത്ത് ഹിറ്റ് ഉണ്ടാകും’ എന്ന ആശയമാണ് സംഘടനയുടെ പേരിന് പിന്നിലുള്ളതെന്ന് ദേശീയ മാധ്യമ റിപ്പോർട്ടുകൾ വ്യക്തമാക്കുന്നു. ഞായറാഴ്ച (2026 ഒക്ടോബർ 18) ഡൽഹിയിലെ മാളവ്യ സ്മൃതി ഭവനിൽ വെച്ചാണ് ലാൽ ഹിറ്റ് ജനതാ പാർട്ടിയുടെ ആദ്യത്തെ യോഗം ചേർന്നത്.

കോക്രോച്ച് (പാറ്റ) എന്ന് പേരുള്ള സിജെപിയെ നേരിടാൻ, പാറ്റകളെ കൊല്ലാൻ വീടുകളിൽ ഉപയോഗിക്കുന്ന ‘ഹിറ്റ്’ (Hit) എന്ന കീടനാശിനിയുടെ പേരാണ് പുതിയ സംഘടന കടമെടുത്തിരിക്കുന്നത്. ‘പാറ്റകളെ ഓടിക്കൂ ഭാരതത്തെ രക്ഷിക്കൂ’ എന്നതാണ് ലാൽ ഹിറ്റ് ജനതാ പാർട്ടിയുടെ പ്രധാന മുദ്രാവാക്യം. സിജെപിയുടെ പ്രതിഷേധങ്ങൾക്കും പ്രവർത്തനങ്ങൾക്കും ബദലായി ശക്തമായ പ്രതിരോധം തീർക്കാനാണ് അയാൻ ഭട്നാഗറും സംഘവും ലക്ഷ്യമിടുന്നത്. പ്രധാനമന്ത്രി നരേന്ദ്ര മോദി ഉൾപ്പെടെയുള്ളവരെയും ഭരണഘടനാ സ്ഥാപനങ്ങളെയും അപമാനിക്കുന്ന സിജെപിയുടെ രീതികളെ ശക്തമായി എതിർക്കുമെന്നും ഇവർ വ്യക്തമാക്കുന്നു.

ലാൽ ഹിറ്റ് ജനതാ പാർട്ടി തിരഞ്ഞെടുപ്പിൽ മത്സരിക്കാൻ രൂപീകരിച്ചിട്ടുള്ളതല്ലെന്നും, രാജ്യത്ത് അരാജകത്വം സൃഷ്ടിക്കാൻ ശ്രമിക്കുന്ന സിജെപിയെ തുറന്നുകാട്ടുക മാത്രമാണ് ലക്ഷ്യമെന്നും കൺവീനർ അയാൻ ഭട്നാഗർ വ്യക്തമാക്കി. സിജെപിയെയും അവരുടെ നേതാവ് അഭിജീത് ദീപകെയെയും ഒരു തുറന്ന സംവാദത്തിനായി അദ്ദേഹം വെല്ലുവിളിച്ചു. ധൈര്യമുണ്ടെങ്കിൽ സംവാദത്തിന് വരാനും, തങ്ങളുടെ ഭാഗം ജനങ്ങളെ ബോധ്യപ്പെടുത്താനും അയാൻ ഭട്നാഗർ ആവശ്യപ്പെട്ടു. ജന്തർമന്തറിലും കൊണാട്ട് പ്ലേസിലുമുൾപ്പെടെ സിജെപി നടത്തുന്ന പ്രതിഷേധങ്ങൾ കാരണം ദസറ-ദീപാവലി ഉത്സവ സീസണിൽ വ്യാപാരികൾക്ക് കോടിക്കണക്കിന് രൂപയുടെ നഷ്ടമാണ് ഉണ്ടാകുന്നതെന്നും യോഗത്തിൽ പങ്കെടുത്തവർ ആരോപിച്ചു.

മാധ്യമ റിപ്പോർട്ടുകൾ പ്രകാരം, ഇതൊരു സംഘ്പരിവാർ അനുകൂല സംഘടനയാണ്. ‘തെരുവിൽ ഇറങ്ങേണ്ട സമയമായി’ എന്നാണ് സിജെപിയെ നേരിടാൻ തയ്യാറെടുക്കുന്ന ലാൽ ഹിറ്റ് ജനതാ പാർട്ടി ആഹ്വാനം ചെയ്യുന്നത്. ജന്തർമന്തറിൽ ഉൾപ്പെടെ അടുത്തിടെ സിജെപി നടത്തിയ പ്രതിഷേധങ്ങളെ പരാമർശിച്ച്, ‘പ്രധാനമന്ത്രി നരേന്ദ്ര മോദി പറഞ്ഞാൽ ഇതിലും വലിയ ആൾക്കൂട്ടം തെരുവിലിറങ്ങും’ എന്നും ലാൽ ഹിറ്റ് ജനതാ പാർട്ടി പ്രവർത്തകർ അവകാശപ്പെടുന്നു. പൊലീസിനെയും സുരക്ഷാ സേനയെയും ആക്രമിക്കുന്ന സിജെപി നേതാക്കൾക്കെതിരെ കർശന നടപടി വേണമെന്നും ഇവർ ആവശ്യപ്പെടുന്നുണ്ട്. സിജെപി നേതാക്കൾക്കെതിരെ പൊലീസ് നടപടികളും അറസ്റ്റും തുടരുന്നതിനിടെയാണ് അവർക്കെതിരെ പുതിയൊരു യുവജന സംഘടന കൂടി രംഗത്തുവരുന്നത് രാഷ്ട്രീയ വൃത്തങ്ങളിൽ വലിയ ചർച്ചയായിട്ടുണ്ട്.