ഫ്രാൻസിലെ ലിമോഗ്സ് നഗരത്തിൽ ജീവിതച്ചെലവ് വർധനവിനും സർക്കാരിന്റെ നയങ്ങൾക്കുമെതിരെ നടക്കുന്ന പ്രക്ഷോഭത്തിനിടെ 143 വർഷം പഴക്കമുള്ള ടൗൺ ഹാൾ കെട്ടിടം അഗ്നിക്കിരയാക്കി. രാജ്യത്തുടനീളം അഞ്ചര ലക്ഷം ആളുകൾ പങ്കെടുത്ത പ്രതിഷേധം വ്യാപകമായ അക്രമങ്ങളിലേക്ക് വഴിമാറുകയായിരുന്നുവെന്ന് ഫ്രഞ്ച് ആഭ്യന്തര മന്ത്രാലയം അറിയിച്ചു.
നാസി അധിനിവേശ കാലത്ത് ഫ്രഞ്ച് പ്രതിരോധ പ്രവർത്തനങ്ങളുടെ പ്രധാന കേന്ദ്രമായിരുന്ന ഈ ചരിത്ര മന്ദിരത്തിന്റെ മൂന്നിൽ രണ്ട് ഭാഗവും കത്തിനശിച്ചതായി പ്രാദേശിക ഭരണകൂടം വ്യക്തമാക്കി. പൈതൃകത്തിന് സംഭവിച്ച വലിയ ദുരന്തമാണിതെന്നാണ് അധികൃതർ ഇതിനെ വിശേഷിപ്പിക്കുന്നത്. വിദ്യാഭ്യാസ രംഗത്തെ പ്രശ്നങ്ങൾക്കും വിലക്കയറ്റത്തിനുമെതിരെ കഴിഞ്ഞ മാസം വിദ്യാർഥികൾ ആരംഭിച്ച പ്രതിഷേധമാണ് ഇപ്പോൾ രാജ്യവ്യാപകമായ പ്രക്ഷോഭമായി മാറിയിരിക്കുന്നത്.
1940-ൽ നാസി ആക്രമണത്തെ തുടർന്ന് പലായനം ചെയ്ത ബെൽജിയം സർക്കാരിന് അഭയം നൽകിയത് ഈ ടൗൺ ഹാളിലായിരുന്നു. ബെൽജിയം രാജാവ് ലിയോപോൾഡ് മൂന്നാമൻ നാസികൾക്ക് കീഴടങ്ങാൻ തീരുമാനിച്ചപ്പോൾ അതിനെ അപലപിച്ച് മന്ത്രിമാരും ജനപ്രതിനിധികളും ആദ്യം പോയിറ്റിയേഴ്സിലും പിന്നീട് മെയ് 31-ന് ലിമോഗ്സിലുമെത്തുകയായിരുന്നു.
അപ്പോഴത്തെ മേയറായിരുന്ന ലിയോൺ ബെറ്റൂൾ ആണ് ഇവർക്ക് സൗകര്യങ്ങൾ ഒരുക്കിയത്. ഫ്രഞ്ച് പതാകയ്ക്കൊപ്പം ബെൽജിയം പതാകയും പാറിക്കളിച്ചിരുന്ന ഈ കെട്ടിടം അന്ന് പ്രവാസി സർക്കാരിന്റെ ഓഫീസായി പ്രവർത്തിച്ചു.
ഫ്രാൻസിലെ ജർമൻ അധിനിവേശ സമയത്ത് പ്രതിരോധ സേനയുടെ ഒരു പ്രധാന താവളം കൂടിയായിരുന്നു ഇത്. മുനിസിപ്പൽ ജീവനക്കാരനായ ലൂസിയൻ ബെർഡാസെ ജൂതന്മാരുടെ വിവരങ്ങൾ അടങ്ങിയ പട്ടികകൾ നശിപ്പിച്ചും വ്യാജ രേഖകൾ ചമച്ചും കെട്ടിടത്തിൽ ആയുധങ്ങൾ ഒളിപ്പിച്ചും പ്രതിരോധ സേനാംഗങ്ങളെ സഹായിച്ചിരുന്നു.
ഇതിനുപുറമെ റേഷൻ കാർഡുകൾ വിതരണം ചെയ്തിരുന്ന സൂസൻ റോഡി-ബോയർ മുനിസിപ്പാലിറ്റിയുടെ സീലുകൾ ഉപയോഗിച്ച് വ്യാജ രേഖകൾ നൽകി ജൂത കുടുംബങ്ങളെ രക്ഷപ്പെടാനും സഹായിച്ചു. പിന്നീട് 1945 മാർച്ച് നാലിന് ജനറൽ ചാൾസ് ഡി ഗാൾ ഈ ടൗൺ ഹാൾ സന്ദർശിച്ചിരുന്നു.
പ്രതിരോധ സേനയിലെ പ്രമുഖനും ഓർഡർ ഓഫ് ലിബറേഷൻ അംഗവുമായ ജോർജ് ഗിൻഗൗയിൻ 1945 ഏപ്രിൽ മുതൽ 1947 ഒക്ടോബർ വരെ ലിമോഗ്സ് മേയറായി സേവനമനുഷ്ഠിക്കുകയും ചെയ്തിരുന്നു. അത്തരത്തിൽ സമ്പന്നമായ ചരിത്രമുള്ള കെട്ടിടമാണ് ഇപ്പോൾ നശിപ്പിക്കപ്പെട്ടിരിക്കുന്നത്.
Be the first to comment