സൗദി അറേബ്യയിലേക്കുള്ള വിമാന സർവീസുകൾ റദ്ദാക്കിയത് എയർ ഇന്ത്യ നീട്ടി. ഒക്ടോബർ 24 വരെ സൗദിയിലേക്ക് എയർ ഇന്ത്യ സർവീസ് നടത്തില്ലെന്ന് അധികൃതർ അറിയിച്ചു. സൗദിയിൽ ഹൂതി വിമതർ നടത്തുന്ന നിരന്തര ആക്രമണത്തിൻ്റെ പശ്ചാത്തലത്തിലാണ് സർവീസുകൾ താൽക്കാലികമായി റദ്ദാക്കിയത്.
സൗദി അറേബ്യയിലെ പ്രധാന വിമാനത്താവളങ്ങളായ ജിദ്ദ, റിയാദ്, ദമ്മാം എന്നിവിടങ്ങളിലേക്കുള്ള വിമാന സർവീസുകളാണ് ഒക്ടോബർ 24 വരെ താൽക്കാലികമായി നിർത്തിവെച്ചതെന്ന് എയർ ഇന്ത്യയും എയർ ഇന്ത്യ എക്സ്പ്രസും അറിയിച്ചു.
വിമാനങ്ങൾ റദ്ദാക്കിയ സാഹചര്യത്തിൽ യാത്രക്കാർക്കായുള്ള റീഫണ്ടും യാത്രാ തീയതികൾ മാറ്റാനുള്ള പ്രത്യേക സൗകര്യവും എയർ ഇന്ത്യ ഒരുക്കിയിട്ടുണ്ട്. ഒക്ടോബർ ഒൻപത് മുതൽ ഒക്ടോബർ 25 വരെയുള്ള തീയതികൾക്കിടയിലെ യാത്രയ്ക്കായി, ഒക്ടോബർ 15-നോ അതിന് മുൻപോ ടിക്കറ്റ് ബുക്ക് ചെയ്ത യാത്രക്കാർക്ക് നവംബർ 10 വരെ തികച്ചും സൗജന്യമായി യാത്രാ തീയതി ഒരുതവണ മാറ്റാമെന്ന് എയർ ഇന്ത്യ വ്യക്തമാക്കി. ഇതിന് പുറമെ യാത്രക്കാർക്ക് വേണമെങ്കിൽ ടിക്കറ്റ് തുകയുടെ പൂർണ റീഫണ്ടും നേടാം.
ഹൂതികൾ നടത്തുന്ന ആക്രമണങ്ങൾ അന്താരാഷ്ട്ര മനുഷ്യാവകാശ നിയമങ്ങളെല്ലാം ലംഘിച്ചുകൊണ്ടുള്ള കടുത്ത യുദ്ധക്കുറ്റമാണെന്ന് സൗദി അറേബ്യ മുൻപ് തന്നെ ആരോപിച്ചിരുന്നു. മുസ്‌ലിം മതവിശ്വാസികളുടെ വിശുദ്ധ കേന്ദ്രങ്ങളെയും തീർഥാടകരെയും അപകടത്തിലാക്കുകയാണ് ഇത്തരം ആക്രമണങ്ങളിലൂടെ ഹൂതികളെന്ന് സൗദി കുറ്റപ്പെടുത്തി.
അതേസമയം, രാജ്യത്തെ വിമാനത്താവളങ്ങൾ ആക്രമിക്കപ്പെടാൻ വലിയ സാധ്യതയുണ്ടെന്ന് സൗദിയിലെ യു.എസ്. എംബസി കർശന മുന്നറിയിപ്പ് നൽകുകയും, തങ്ങളുടെ ഉദ്യോഗസ്ഥരുടെ യാത്രകൾക്ക് കടുത്ത നിയന്ത്രണം ഏർപ്പെടുത്തുകയും ചെയ്തിരുന്നു. ഈ സുരക്ഷാ മുന്നറിയിപ്പുകളുടെ കൂടി പശ്ചാത്തലത്തിലാണ് വിമാനക്കമ്പനികൾ സർവീസുകൾ നിർത്തിവെച്ചിരിക്കുന്നത്.
Be the first to comment