തിരുവനന്തപുരം: മുഖ്യമന്ത്രി വി.ഡി. സതീശനെതിരേ കെപിസിസി ആസ്ഥാനത്ത് വാർത്താ സമ്മേളനം നടത്തി വിമർശനം ഉന്നയിച്ച യുഡിഎഫ് കൺവീനർ അടൂർ പ്രകാശിന്‍റെ നടപടിയിൽ ഹൈക്കമാൻഡിനും അതൃപ്തി.
യുഡിഎഫ് കൺവീനറുടെ പരസ്യപ്രസ്താവനയിൽ വി.ഡി. സതീശൻ എഐസിസി സെക്രട്ടറി ദീപാ ദാസ് മുൻഷിയോട് പരാതി അറിയിച്ചു. അടൂർ പ്രകാശും മുഖ്യമന്ത്രിയുടെ പ്രവർത്തനശൈലിക്കെതിരേ പരാതി ഹൈക്കമാൻഡിനെ അറിയിച്ചിട്ടുണ്ട്. ഈ വിഷയം പരിശോധിച്ച് റിപ്പോർട്ട് സമർപ്പിക്കാൻ പ്രസിഡന്‍റ് മല്ലികാർജുൻ ഖാർഗെ ദീപാ ദാസ് മുൻഷിയെ ചുമതലപ്പെടുത്തി.
പാർട്ടി സർക്കാർ ഏകോപനം ഇല്ലാതെയാണ് മുഖ്യമന്ത്രിയുടെ പോക്കെന്നും യുഡിഎഫിൽ ആലോചിക്കാതെയാണ് പല കാര്യങ്ങളും സ്വന്തം നിലയ്ക്ക് മുഖ്യമന്ത്രി തീരുമാനിക്കുന്നത് എന്നുമാണ് അടൂർ പ്രകാശ് ഹൈക്കമാൻഡിനെ ബോധിപ്പിച്ചിരിക്കുന്നത്.
മുഖ്യമന്ത്രിയുടെ പ്രവർത്തന ശൈലി കോൺഗ്രസ് പാർട്ടിയിലെ മുതിർന്ന നേതാക്കൾക്കും ഘടകകക്ഷി നേതാക്കൾക്കും അതിർത്തിയുണ്ടെന്നും കോൺഗ്രസിലെ പല നേതാക്കളും ഹൈക്കമാൻഡിന് പരാതി അറിയിച്ചിട്ടുണ്ട്.
കെപിസിസി ആസ്ഥാനമായ ഇന്ദിരാഭവനിൽ വാർത്താ സമ്മേളനം നടത്തി മുഖ്യമന്ത്രിയുടെ പ്രവർത്തനശൈലിക്കെതിരെ വിമർശനം ഉന്നയിച്ച യുഡിഎഫ് കൺവീനർ അടൂർ പ്രകാശിനെ അനുകൂലിച്ചും പ്രതികൂലിച്ചും നേതാക്കളും മന്ത്രിമാരും രംഗത്തെത്തിയിട്ടുണ്ട്.
ഭരണപരിഷ്കാര കമ്മീഷൻ ചെയർമാനായി മുസ്‌ലിം ലീഗിലെ എം.കെ. മുനീറിനെ തീരുമാനിച്ച കാര്യം യുഡിഎഫ് ചർച്ച ചെയ്തിട്ടില്ല എന്നും താനിക്കാര്യം അറിഞ്ഞിട്ടില്ലെന്നും അടൂർ പ്രകാശ് പരസ്യമായി വിമർശനം ഉന്നയിച്ചിരുന്നു. പല കാര്യങ്ങളും മുഖ്യമന്ത്രി താനുമായി കൂടിയാലോചന നടത്താറില്ലെന്നുമായിരുന്നു അദ്ദേഹത്തിന്‍റെ വിമർശനം.
സംഭവം വിവാദമായെങ്കിലും താൻ പറഞ്ഞതിൽ ഉറച്ചുനിൽക്കുന്നു എന്നും അനുഭവത്തിൽ വെളിച്ചത്തിൽ ഉള്ള കാര്യങ്ങളാണ് താൻ വ്യക്തമാക്കിയത് എന്നും അടൂർ പ്രകാശ് ആവർത്തിച്ച് പറഞ്ഞതും വിവാദത്തിന് ആക്കം കൂട്ടിയിട്ടുണ്ട്. മന്ത്രി കെ. മുരളീധരൻ മുഖ്യമന്ത്രിക്ക് പൂർണ പിന്തുണ നൽകിക്കൊണ്ട് അടൂർ പ്രകാശിന്‍റെ വിമർശനങ്ങളെ തള്ളിക്കളഞ്ഞിരിക്കുകയാണ്.
യുഡിഎഫ് സർക്കാർ അധികാരത്തിലേറി 100 ദിവസങ്ങൾ പിന്നിട്ടിട്ടും മുന്നണിയിൽ തർക്കങ്ങളും വാക്കേറ്റങ്ങളും ഉണ്ടാകുന്നത് ജനങ്ങളുടെ പ്രതീക്ഷയ്ക്ക് മങ്ങൽ വരുത്തുന്നതിന് കാരണമായിട്ടുണ്ട് എന്നാണ് ഭൂരിഭാഗം കോൺഗ്രസ് നേതാക്കളുടെയും അഭിപ്രായം.
ജനങ്ങൾ നൽകിയ വിശ്വാസവും പ്രതീക്ഷയും കാത്തുസൂക്ഷിക്കണമെന്നും ഗാന്ധിയൻ ആദർശങ്ങൾ മുറുകെപ്പിടിച്ച് മുന്നോട്ട് പോകണമെന്നും ഈ വിഷയത്തിൽ നിയമസഭാ സ്പീക്കർ തിരുവഞ്ചൂർ രാധാകൃഷ്ണൻ അഭിപ്രായപ്പെട്ടു.
Be the first to comment