കൊല്ലം ചിന്നക്കടയിൽ എസ്എഫ്ഐ നടത്തിയ പ്രകടനത്തിനിടെ അന്തരിച്ച സിപിഐഎം മുൻ സംസ്ഥാന സെക്രട്ടറി കോടിയേരി ബാലകൃഷ്ണന്റെ ഫ്ലെക്സ് ബോർഡ് കീറി മാറ്റിയ സംഭവത്തിൽ വിശദീകരണവുമായി യുവനേതാവ് അക്ബർ ഷാ. സോഷ്യൽ മീഡിയയിൽ പങ്കുവെച്ച വിഡിയോയിലൂടെയാണ് തനിക്ക് പറ്റിയ ആബദ്ധത്തെക്കുറിച്ച് അക്ബർ ഷാ തുറന്നുപറഞ്ഞത്.
കോൺഗ്രസിന്റെ ഫ്ലെക്സ് ബോർഡാണെന്ന് തെറ്റിദ്ധരിച്ചാണ് കോടിയേരിയുടെ ബോർഡ് കീറിയതെന്നും പാർട്ടിയുടെ പ്രകടനത്തിൽ നുഴഞ്ഞുകയറി മനഃപൂർവ്വം പ്രശ്നമുണ്ടാക്കിയതല്ലെന്നും അദ്ദേഹം വ്യക്തമാക്കി. തനിക്ക് വലിയൊരു അബദ്ധം സംഭവിച്ചതാണെന്നും എല്ലാവരും ക്ഷമിക്കണമെന്നും അക്ബർ ഷാ വിഡിയോ സന്ദേശത്തിലൂടെ അഭ്യർത്ഥിച്ചു.
താൻ മുൻകാല എസ്എഫ്ഐ പ്രവർത്തകനാണെന്നും നിലവിൽ ഡിവൈഎഫ്ഐയുടെ സജീവ പ്രവർത്തകനാണെന്നും അക്ബർ ഷാ പറയുന്നു. പാർട്ടിപ്രവർത്തകർ പ്രചരിപ്പിക്കുന്നത് പോലെ താൻ പുറത്തുനിന്നുള്ളയാളോ നുഴഞ്ഞുകയറ്റക്കാരനോ അല്ലെന്നും അദ്ദേഹം കൂട്ടിച്ചേർത്തു.
മൂന്ന് വർഷത്തോളമായി വിദേശത്തായിരുന്ന താൻ അടുത്തിടെയാണ് നാട്ടിലെത്തിയത്. കൊല്ലത്ത് പ്രകടനം കണ്ടപ്പോൾ ആവേശത്തോടെ അതിലേക്ക് കയറുകയായിരുന്നുവെന്നും അല്ലാതെ പ്രകടനത്തെ തകർക്കാൻ ശ്രമിച്ചതല്ലെന്നും അദ്ദേഹം വിഡിയോയിൽ സമർത്ഥിക്കുന്നു.
സംഭവം വൻ വിവാദമായതോടെ എസ്എഫ്ഐ കൊല്ലം ജില്ലാ നേതൃത്വം കടുത്ത നിലപാടിലേക്ക് കടന്നിരുന്നു. പൊതുമുതലും ഫ്ലെക്സ് ബോർഡും തകർത്തയാൾക്കെതിരെ നിയമനടപടികളുമായി മുന്നോട്ട് പോകാനാണ് ഡിവൈഎഫ്ഐയും എസ്എഫ്ഐയും തീരുമാനിച്ചിരുന്നത്.
വിവാദം ഉയർന്നതിന് പിന്നാലെ കീറി നശിപ്പിക്കപ്പെട്ട ഫ്ലെക്സ് ബോർഡിന് പകരം അതേസ്ഥലത്ത് പുതിയ ഫ്ലെക്സ് ബോർഡ് പ്രവർത്തകർ സ്ഥാപിക്കുകയും ചെയ്തിട്ടുണ്ട്. എന്നാൽ അക്ബർ ഷായുടെ വിഡിയോ വിശദീകരണം പുറത്തുവന്നതോടെ സംഭവത്തിൽ കൂടുതൽ ആഭ്യന്തര ചർച്ചകൾക്ക് വഴിതുറന്നിരിക്കുകയാണ്.
അബദ്ധത്തിൽ സംഭവിച്ചതാണെങ്കിലും പാർട്ടിയുടെ സമുന്നതനായ നേതാവിന്റെ ചിത്രമുള്ള ബോർഡ് കീറിയതിനെതിരെ വലിയ അമർഷമാണ് പ്രാദേശിക പ്രവർത്തകർക്കിടയിൽ നിലനിൽക്കുന്നത്. എങ്കിലും തെറ്റ് മനസ്സിലാക്കി പരസ്യമായി ക്ഷമ ചോദിച്ച പശ്ചാത്തലത്തിൽ തുടർനടപടികൾ എന്താകുമെന്നാണ് എല്ലാവരും ഉറ്റുനോക്കുന്നത്. കഴിഞ്ഞ ദിവസം നടന്ന പ്രകടനത്തിന് പിന്നാലെ നവമാധ്യമങ്ങളിലും വൻ രാഷ്ട്രീയ വാദപ്രതിവാദങ്ങൾ നടന്നിരുന്നു. കോൺഗ്രസ് ഗ്രൂപ്പുകളും വിഷയം പ്രചാരണ ആയുധമാക്കാൻ ശ്രമിച്ചിരുന്നു.
Be the first to comment