സിഎംആർഎൽ-എക്സാലോജിക് ഇടപാടുമായി ബന്ധപ്പെട്ട് പിണറായി വിജയൻ നൽകിയ ഹർജി അടുത്ത ആഴ്ച പരിഗണിക്കുമെന്ന് സുപ്രീം കോടതി. ദസറ അവധിക്കാലത്ത് പ്രത്യേക ബെഞ്ച് രൂപീകരിച്ച് കേസ് പരിഗണിക്കാനാണ് പരമോന്നത കോടതിയുടെ തീരുമാനം. എന്നാൽ മറ്റ് ജഡ്ജിമാരുടെ കൂടി സൗകര്യവും ലഭ്യതയും കണക്കിലെടുത്ത ശേഷമായിരിക്കും ഈ പ്രത്യേക ബെഞ്ച് സംബന്ധിച്ച അന്തിമ തീരുമാനം എടുക്കുക എന്ന് ചീഫ് ജസ്റ്റിസ് വ്യക്തമാക്കി.
കൊച്ചിയിലെ കരിമണൽ ഖനന കമ്പനിയായ സിഎംആർഎല്ലും (CMRL) ടി. വീണയുടെ ഉടമസ്ഥതയിലുള്ള എക്സാലോജിക് സൊല്യൂഷൻസും തമ്മിലുള്ള സാമ്പത്തിക ഇടപാടുകളിലെ ക്രമക്കേടുകളാണ് ഈ കേസിന് ആധാരം.
സുപ്രീം കോടതി ചീഫ് ജസ്റ്റിസിന്റെ നേതൃത്വത്തിലുള്ള ബെഞ്ചാണ് വിഷയം ഇന്ന് പരിഗണിച്ചത്. പിണറായി വിജയന് ഏത് നിമിഷവും അറസ്റ്റ് ഉണ്ടാകാനുള്ള സാധ്യതയുണ്ടെന്ന് അദ്ദേഹത്തിന് വേണ്ടി ഹാജരായ പ്രമുഖ അഭിഭാഷകൻ സിദ്ധാർഥ് ലൂഥ്ര കോടതിയിൽ ചൂണ്ടിക്കാട്ടി. അറസ്റ്റ് ഉണ്ടാകില്ലെന്ന് ബെഞ്ചിലുണ്ടായിരുന്ന ജസ്റ്റിസ് ജോയ്മാല്യ ബാഗ്ചി പറഞ്ഞെങ്കിലും, അറസ്റ്റിനുള്ള സാധ്യത ഇപ്പോഴും ശക്തമായി നിലനിൽക്കുന്നുണ്ടെന്ന് സിദ്ധാർഥ് ലൂഥ്ര ആവർത്തിക്കുകയായിരുന്നു.
ഹർജിക്കാരുടെ ആവശ്യം കണക്കിലെടുത്ത് വരുന്ന ദസറ അവധിക്കാലത്ത് പ്രത്യേക ബെഞ്ച് രൂപീകരിച്ച് കേസിൽ വാദം കേൾക്കാമെന്ന് ചീഫ് ജസ്റ്റിസ് വ്യക്തമാക്കി. സാധാരണഗതിയിൽ വധശിക്ഷാ കേസുകൾ പോലുള്ള കടുത്ത അടിയന്തര സാഹചര്യങ്ങളിൽ മാത്രമാണ് അവധിക്കാലത്ത് സുപ്രീം കോടതി പ്രത്യേക ബെഞ്ച് രൂപീകരിക്കുന്നത്. അടുത്ത ആഴ്ച പ്രത്യേക ബെഞ്ച് രൂപീകരിക്കാൻ സാധിച്ചില്ലെങ്കിൽ, ദസറ അവധി കഴിഞ്ഞ് കോടതി തുറക്കുന്ന ആദ്യ ദിവസമായ ഈ മാസം 26-ന് കേസ് പരിഗണിക്കുമെന്നും സുപ്രീം കോടതി അറിയിച്ചിട്ടുണ്ട്.
ടി. വീണയ്ക്കും മുഹമ്മദ് റിയാസിനും വേണ്ടി പ്രമുഖ അഭിഭാഷകൻ എൻ. ഹരിഹരനാണ് സുപ്രീം കോടതിയിൽ ഹാജരായത്. കേസ് അടിയന്തരമായി കേൾക്കണമെന്നും അടുത്ത ആഴ്ച വാദം കേൾക്കുന്ന കൃത്യമായ തീയതി വ്യക്തമാക്കണമെന്നും അദ്ദേഹം കോടതിയോട് അഭ്യർഥിച്ചു. എന്നാൽ ജഡ്ജിമാരുടെ സൗകര്യം അറിയേണ്ടതുണ്ടെന്ന് വ്യക്തമാക്കി തീയതി ഉടനടി പ്രഖ്യാപിക്കാൻ ചീഫ് ജസ്റ്റിസ് തയ്യാറായില്ല.
അടുത്ത ആഴ്ച ദസറ അവധിയുടെ പശ്ചാത്തലത്തിൽ ചീഫ് ജസ്റ്റിസ് ഡൽഹിക്ക് പുറത്തേക്ക് പോകുന്നതിനാൽ, അദ്ദേഹത്തിന്റെ നേതൃത്വത്തിലായിരിക്കില്ല ഈ പ്രത്യേക അവധിക്കാല ബെഞ്ച് രൂപീകരിക്കപ്പെടുക. പ്രത്യേക ബെഞ്ച് രൂപീകരണവുമായി ബന്ധപ്പെട്ട അഡ്മിനിസ്ട്രേറ്റീവ് തീരുമാനം ശനിയാഴ്ചയ്ക്കുള്ളിൽ ഉണ്ടായേക്കുമെന്നാണ് നിയമവൃത്തങ്ങൾ നൽകുന്ന സൂചന.
Be the first to comment