യെമനിലെ ഹൂതികൾ സൗദി അറേബ്യയ്ക്ക് നേരെ വീണ്ടും ആക്രമണം നടത്തിയതിനെ തുടർന്ന് ആഗോള വിപണിയിൽ എണ്ണവില കുതിച്ചുയർന്നു. സർക്കാർ ഉടമസ്ഥതയിലുള്ള ഊർജ ഭീമനായ അരാംകോയുടെ കേന്ദ്രങ്ങൾക്ക് നേരെയും ആക്രമണം നടന്നതായി ഹൂതികൾ അവകാശപ്പെട്ടു.
യുഎസ്-ഇസ്രായേൽ സഖ്യം ഇറാനുമായി നടത്തുന്ന സംഘർഷം കാരണം ഊർജ വിതരണത്തിൽ നിലവിൽ കടുത്ത പ്രതിസന്ധിയുണ്ട്. ഇതിന് പുറമെ പുതിയ ആക്രമണങ്ങൾ വിതരണത്തെ കൂടുതൽ തടസ്സപ്പെടുത്തുമെന്ന ആശങ്ക ഉയർന്നതോടെ ആഗോള വിലയുടെ പ്രധാന മാനദണ്ഡമായ ബ്രെൻ്റ് ക്രൂഡിൻ്റെ വില വ്യാഴാഴ്ച മൂന്ന് ശതമാനത്തിലധികം വർധിച്ചു.
റിയാദിലെ ഒരു പ്രധാന ലക്ഷ്യസ്ഥാനത്തേക്കും, ചെങ്കടൽ നഗരമായ യാൻബുവിലെ അരാംകോ കേന്ദ്രങ്ങൾക്കു നേരെയും മിസൈൽ, ഡ്രോൺ ആക്രമണങ്ങൾ നടത്തിയതായി ഹൂതികൾ വ്യാഴാഴ്ച അവകാശപ്പെട്ടു. രണ്ട് ആക്രമണങ്ങളും ലക്ഷ്യം കണ്ടതായി ഹൂതികളുടെ നിയന്ത്രണത്തിലുള്ള യെമൻ ന്യൂസ് ഏജൻസി പുറത്തുവിട്ട പ്രസ്താവനയിൽ പറയുന്നു. എന്നാൽ, രാജ്യത്തിന് നേരെ ഹൂതികൾ തൊടുത്തുവിട്ട ആറ് ബാലിസ്റ്റിക് മിസൈലുകൾ തടഞ്ഞതായി സൗദിയുടെ നേതൃത്വത്തിലുള്ള സഖ്യസേന നേരത്തെ അറിയിച്ചിരുന്നു.
ആക്രമണത്തിൽ എന്തെങ്കിലും നാശനഷ്ടങ്ങളോ ആളപായമോ ഉണ്ടായതായി സൗദി അധികൃതർ സ്ഥിരീകരിച്ചിട്ടില്ല. ആഗോള എണ്ണ ആവശ്യകതയുടെ 10 ശതമാനത്തോളം വിതരണം ചെയ്യുന്ന അരാംകോ, സാധാരണ പ്രവൃത്തി സമയത്തിന് പുറത്തായതിനാൽ ഇതുമായി ബന്ധപ്പെട്ട മാധ്യമങ്ങളുടെ അന്വേഷണങ്ങളോട് പ്രതികരിച്ചില്ല.
വ്യാഴാഴ്ച ഒരു ഘട്ടത്തിൽ ബാരലിന് 108 ഡോളർ കടന്ന നവംബറിലെ ബ്രെൻ്റ് ഫ്യൂച്ചേഴ്സ്, വ്യാപാരം അവസാനിച്ചപ്പോൾ 106.50 ഡോളറിന് മുകളിലായിരുന്നു. വെള്ളിയാഴ്ച രാവിലെ ഏഷ്യൻ വിപണിയിൽ വിലയിൽ നേരിയ കുറവുണ്ടായി. 02:00 ജിഎംടി പ്രകാരം ബാരലിന് 105.77 ഡോളറാണ് നിലവിലെ വില.
ഇറാനുമായുള്ള സംഘർഷം തുടരുന്നിടത്തോളം കാലം എണ്ണവില ബാരലിന് 100 ഡോളറിന് മുകളിൽ തന്നെ തുടരാനാണ് സാധ്യതയെന്ന് സിംഗപ്പൂരിലെ സ്പാർട്ട കമ്മോഡിറ്റീസിലെ സീനിയർ ഓയിൽ മാർക്കറ്റ് അനലിസ്റ്റ് ജൂൺ ഗോ പ്രതികരിച്ചതായി അൽ ജസീറ റിപ്പോർട് ചെയ്തു. വ്യക്തമായ ഒരു പരിഹാരം കാണാത്തതിനാൽ, ആഗോളതലത്തിൽ എണ്ണ ശേഖരണത്തിലെ വിടവ് വർധിച്ചുകൊണ്ടിരിക്കുകയാണെന്നും അദ്ദേഹം കൂട്ടിച്ചേർത്തു.
സംഘർഷാനന്തര പ്രവണതയുമായി താരതമ്യം ചെയ്യുമ്പോൾ, ഈ ഉയർന്ന നിരക്കുകൾ വ്യക്തമാക്കുന്നത് പ്രധാന വിതരണ മാർഗങ്ങളും കേന്ദ്രങ്ങളും ഇപ്പോഴും സുരക്ഷിതമല്ലെന്ന യാഥാർഥ്യമാണെന്ന് ഓസ്ട്രേലിയയിലെ സിഡ്നിയിലുള്ള കെസിഎം ട്രേഡിൻ്റെ ചീഫ് മാർക്കറ്റ് അനലിസ്റ്റ് ടിം വാട്ടറർ പ്രതികരിച്ചു. യുഎൻ വേദിയിലെ നയതന്ത്ര ശ്രമങ്ങൾ ഒരു പരിധിവരെ ആശ്വാസം നൽകുന്നുണ്ടെങ്കിലും, സംഘർഷം കുറയുന്നതിൻ്റെ വ്യക്തമായ തെളിവുകൾ ലഭിക്കുന്നത് വരെ വിലക്കയറ്റത്തിനുള്ള സാധ്യത തുടരുമെന്നും അദ്ദേഹം വ്യക്തമാക്കി.
Be the first to comment