വൈറ്റ് ഹൗസിൽനിന്ന് വാർത്തകൾ റിപ്പോർട്ട് ചെയ്യുന്നതിൽനിന്ന് മൂന്ന് പ്രമുഖ യുഎസ് മാധ്യമങ്ങൾക്ക് പ്രസിഡന്റ് ഡൊണാൾഡ് ട്രംപ് വിലക്കേർപ്പെടുത്തിയതിൽ പ്രതിഷേധിച്ച് വൈറ്റ് ഹൗസ് പൂൾ കവറേജ് താൽക്കാലികമായി നിർത്തിവെച്ച് യുഎസിലെ പ്രധാന ടെലിവിഷൻ നെറ്റ്വർക്കുകൾ. സി.എൻ.എൻ (CNN), എം.എസ് നൗ (MS Now), പോളിറ്റിക്കോ (Politico) എന്നീ സ്ഥാപനങ്ങളുടെ പ്രസ് പാസുകൾ റദ്ദാക്കുകയും വൈറ്റ് ഹൗസ് വളപ്പിൽ പ്രവേശിക്കുന്നതിൽനിന്ന് വിലക്കുകയും ചെയ്തതിനെ തുടർന്നാണ് നടപടി.
വാർത്താ വിതരണത്തിനായി അഞ്ച് പ്രധാന നെറ്റ്വർക്കുകൾ ഊഴമനുസരിച്ച് നടത്തുന്ന ‘പ്രസ് പൂൾ’ ഷെഡ്യൂളിൽനിന്ന് സി.എൻ.എന്നിനെ ഭരണകൂടം ഒഴിവാക്കിയിരുന്നു. ഇതിൽ പ്രതിഷേധിച്ച് എ.ബി.സി, സി.ബി.എസ്, എൻ.ബി.സി, ഫോക്സ് ന്യൂസ് തുടങ്ങിയ നെറ്റ്വർക്കുകൾ സംയുക്തമായി വൈറ്റ് ഹൗസ് കവറേജ് ബഹിഷ്കരിക്കാൻ തീരുമാനിക്കുകയായിരുന്നു. ഭരണകൂടത്തിന്റെ നിലപാടിൽ പ്രതിഷേധിച്ച് പകരം പൂൾ സംവിധാനം നൽകില്ലെന്ന് ഫോക്സ് ന്യൂസ് ബ്യൂറോ ചീഫും പ്രസ് പൂൾ അധ്യക്ഷനുമായ ബ്രയാൻ ബോട്ടൺ വ്യക്തമാക്കി.
മാധ്യമവിലക്കിനെതിരെ ഒന്നാം ഭരണഘടനാ ഭേദഗതി ഉന്നയിച്ച് സി.എൻ.എൻ, എം.എസ് നൗ, പോളിറ്റിക്കോ എന്നിവർ ചേർന്ന് ട്രംപ് ഭരണകൂടത്തിനെതിരെ ഫെഡറൽ കോടതിയിൽ ഹർജി നൽകിയിട്ടുണ്ട്. അതേസമയം, വ്യാജവാർത്തകൾ നൽകുന്നതിനെതിരെയാണ് നടപടിയെന്നും പത്രസ്വാതന്ത്ര്യത്തെ തടയുന്നില്ലെന്നുമാണ് ട്രംപിന്റെ വാദം. യു.എൻ പൊതുസഭ ഉൾപ്പെടെയുള്ള പ്രധാന പരിപാടികൾ നടക്കാനിരിക്കെ മാധ്യമങ്ങൾ കവറേജ് ബഹിഷ്കരിച്ചത് ട്രംപ് ഭരണകൂടത്തിന് തിരിച്ചടിയായിട്ടുണ്ട്.
Be the first to comment