സന്നിധാനത്ത് അരവണ ക്ഷാമം രൂക്ഷം: വിതരണം വെട്ടിച്ചുരുക്കി, പ്ലാൻ്റ് നവീകരണം ഭക്തരെ വലച്ചു

ശബരിമല സന്നിധാനത്ത് അരവണ ക്ഷാമം രൂക്ഷമായതോടെ വിതരണത്തിൽ നിയന്ത്രണം ഏർപ്പെടുത്തി. ഒരാൾക്ക് ഒരു ടിൻ അരവണയും മൂന്ന് കവർ അപ്പവുമാണ് ഞായറാഴ്ച (സെപ്റ്റംബർ 20) വിതരണം ചെയ്തത്. അരവണ പ്ലാൻ്റിൽ നവീകരണം നടക്കുന്നതിനാൽ ഉത്പാദനം താൽക്കാലികമായി നിർത്തിവെച്ചതാണ് ക്ഷാമത്തിന് പ്രധാന കാരണം. കന്നിമാസ പൂജയ്ക്കായി മുൻവർഷങ്ങളെ അപേക്ഷിച്ച് കൂടുതൽ തീർഥാടകർ എത്തിയിരുന്നു. അരവണ ശേഖരം കുറഞ്ഞതിനെ തുടർന്ന് ഞായറാഴ്ച ഉച്ചയ്ക്ക് 1.30-ഓടുകൂടി കൗണ്ടറുകൾ അടച്ചു. പിന്നീട് വൈകിട്ട് അഞ്ച് മണിക്കാണ് വീണ്ടും തുറന്നത്.

കന്നിമാസ പൂജയ്ക്ക് 2.6 ലക്ഷം അരവണയാണ് നിർമിച്ചത്. ഈ വർഷം 50,000 യൂണിറ്റ് കൂടുതൽ ഉത്പാദിപ്പിച്ചതായി ദേവസ്വം ബോർഡ് അധികൃതർ പറയുന്നു. തിങ്കളാഴ്ചത്തേക്ക് (സെപ്റ്റംബർ 21) 14,000 ടിന്നിൽ താഴെ അരവണ മാത്രമാണ് ബാക്കിയുള്ളത്. അപ്പത്തിന് നിലവിൽ ക്ഷാമമില്ലെന്നാണ് അധികൃതർ വ്യക്തമാക്കുന്നത്. അരവണയുടെ കരുതൽ ശേഖരം തീരുന്ന മുറയ്ക്ക് വിൽപനയും പൂർണമായി നിർത്തിവെക്കും.

ശബരിമലയിൽ ആദ്യമായാണ് മാസപൂജയ്ക്ക് അരവണ നിർമാണം നിർത്തിവെക്കുന്നതെന്ന് തിരുവിതാംകൂർ ദേവസ്വം എംപ്ലോയീസ് ഫ്രണ്ട് ഭാരവാഹികൾ പറയുന്നു. കന്നിമാസ പൂജയ്ക്ക് വിതരണം ചെയ്ത അരവണ ചിങ്ങമാസ പൂജയ്ക്ക് ബാക്കിവന്നതാണ്. ആദ്യമായാണ് പൂജയ്ക്ക് അരവണ പ്ലാൻ്റ് പ്രവർത്തിക്കാതിരിക്കുന്നത്. ആറ് ലക്ഷം യൂണിറ്റ് ഉത്പാദിപ്പിക്കേണ്ട സ്ഥാനത്താണ് 3.2 ലക്ഷം യൂണിറ്റ് മാത്രം ഉത്പാദിപ്പിച്ചത്. ഇതുകൊണ്ടുതന്നെ നഷ്ടം നാല് കോടി രൂപയ്ക്ക് അടുത്തുവരുമെന്ന് ഇവർ ചൂണ്ടിക്കാട്ടുന്നു.

കന്നിമാസ പൂജയ്ക്ക് സന്നിധാനത്ത് അനിയന്ത്രിതമായ തിരക്കായിരുന്നു അനുഭവപ്പെട്ടത്. വെർച്വൽ ക്യൂവിൽ കൂടി ബുക്ക് ചെയ്തുവരുന്നവരുടെ എണ്ണം മുൻകൂട്ടി അറിയാനുള്ള സംവിധാനം ഉണ്ടായിട്ടുകൂടി കൃത്യമായ മുന്നൊരുക്കങ്ങൾ നടത്താതെ ഭക്തരെ വലയ്ക്കുന്ന സമീപനമാണ് അധികൃതരുടെ ഭാഗത്തുനിന്നും ഉണ്ടായതെന്ന് എംപ്ലോയീസ് ഫ്രണ്ട് ആരോപിക്കുന്നു.