യുഎസ് സുപ്രീം കോടതിക്ക് പുല്ലുവില; ജനനാവകാശ പൗരത്വം ലക്ഷ്യമിട്ട് ട്രംപിന്റെ പുതിയ ഉത്തരവ്

ഡോ. ജോർജ് എം. കാക്കനാട്

ഹൂസ്റ്റണ്‍: തന്റെ മുന്‍ നീക്കം ഭരണഘടനാ വിരുദ്ധമാണെന്ന് ചൂണ്ടിക്കാട്ടി സുപ്രീം കോടതി തള്ളിയതിന് ആഴ്ചകള്‍ക്ക് ശേഷം, കുടിയേറ്റ വിരുദ്ധ നടപടികള്‍ വീണ്ടും ശക്തമാക്കിക്കൊണ്ട് യുഎസ് പ്രസിഡന്റ് ഡൊണാള്‍ഡ് ട്രംപ് വ്യാഴാഴ്ച ജനനാവകാശ പൗരത്വത്തിന് കൂടുതല്‍ നിയന്ത്രണങ്ങള്‍ ഏര്‍പ്പെടുത്തുന്ന രണ്ട് പുതിയ എക്‌സിക്യൂട്ടീവ് ഉത്തരവുകളില്‍ ഒപ്പുവെച്ചു.

ട്രംപിന്റെ മുന്‍ ഉത്തരവിനേക്കാള്‍ കൂടുതല്‍ നിയന്ത്രിത സമീപനമാണ് ഈ പുതിയ ഉത്തരവുകള്‍ സ്വീകരിക്കുന്നത്. ഭരണഘടനയുടെ 14-ാം ഭേദഗതിയിലെ പൗരത്വ വ്യവസ്ഥയ്ക്ക് കീഴില്‍ സംരക്ഷണം ലഭിക്കാന്‍ അര്‍ഹതയില്ലെന്ന് ഭരണകൂടം വാദിക്കുന്ന പ്രത്യേക വിഭാഗങ്ങളെയാണ് ഇവ ലക്ഷ്യമിടുന്നത്. ‘ബര്‍ത്ത് ടൂറിസത്തിനായി’ (പ്രസവ ആവശ്യത്തിനായി മാത്രം) അമേരിക്കയിലേക്ക് യാത്ര ചെയ്യുന്ന ആളുകള്‍ക്ക് ജനിക്കുന്ന കുട്ടികള്‍, യുഎസിലുള്ള വിദേശ ഗവണ്‍മെന്റ് ജീവനക്കാരുടെ കുട്ടികള്‍, ശത്രുരാജ്യങ്ങളിലെ പൗരന്മാരായി കണക്കാക്കപ്പെടുന്നവരുടെ കുട്ടികള്‍ എന്നിവര്‍ ഇതില്‍ ഉള്‍പ്പെടുന്നു.

യുഎസ് പ്രദേശങ്ങളില്‍ സ്വയമേവയുള്ള പൗരത്വം അവസാനിപ്പിക്കുന്നതിന് കോണ്‍ഗ്രസ് നിര്‍ദ്ദിഷ്ട നിയമനിര്‍മ്മാണം പാസാക്കുകയാണെങ്കില്‍, അമേരിക്കന്‍ പ്രദേശങ്ങളില്‍ ജനിക്കുന്ന ആളുകളെയും ഈ ഉത്തരവുകള്‍ ബാധിച്ചേക്കാം. ഈ പുതിയ നിര്‍ദ്ദേശങ്ങള്‍ ഭരണഘടന വാഗ്ദാനം ചെയ്യുന്ന ജനനാവകാശ പൗരത്വത്തിന്റെ പരിധിക്ക് പുറത്തുള്ള ഗ്രൂപ്പുകള്‍ക്കാണ് ബാധകമാകുന്നത് എന്നതിനാല്‍, ഇത് സുപ്രീം കോടതിയുടെ ജൂണ്‍ 30-ലെ വിധിയെ ലംഘിക്കുന്നില്ലെന്ന് വൈറ്റ് ഹൗസ് വ്യക്തമാക്കി.

‘ഈ ഉത്തരവില്‍ ഒപ്പുവെക്കുന്നതോടെ ബര്‍ത്ത് ടൂറിസം എന്ന രീതി നിരോധിച്ചിരിക്കുകയാണ്. ഇതിനര്‍ത്ഥം ലോകത്താര്‍ക്കും ഈ തട്ടിപ്പ് ആവശ്യത്തിനായി മേലില്‍ വിസ ലഭിക്കില്ല എന്നാണ്.’- ഓവല്‍ ഓഫീസില്‍ നടന്ന ഒപ്പുവെക്കല്‍ ചടങ്ങില്‍ വൈറ്റ് ഹൗസ് ഉപദേഷ്ടാവ് സ്റ്റീഫന്‍ മില്ലര്‍ വ്യക്തമാക്കാം. അതേസമയം ഈ എക്‌സിക്യൂട്ടീവ് ഉത്തരവകള്‍ ഉടന്‍ തന്നെ നിയമപരമായ വെല്ലുവിളികള്‍ നേരിടേണ്ടി വരുമെന്നാണ് പ്രതീക്ഷിക്കുന്നത്.

ജനനാവകാശ പൗരത്വം പരിമിതപ്പെടുത്തുന്നത് ട്രംപിന്റെ കുടിയേറ്റ നയങ്ങളുടെ പ്രധാന മുന്‍ഗണനയായി തുടരുകയാണ്. ഗര്‍ഭിണികളായ വിദേശ പൗരന്മാര്‍ പ്രസവിക്കാനായി മാത്രം യുഎസിലേക്ക് യാത്ര ചെയ്യുന്ന ‘ബര്‍ത്ത് ടൂറിസം’ എന്നതിലാണ് ഭരണകൂടം പ്രധാനമായും ശ്രദ്ധ കേന്ദ്രീകരിക്കുന്നത്. സെന്റര്‍ ഫോര്‍ ഇമിഗ്രേഷന്‍ സ്റ്റഡീസിന്റെ 2020 ലെ കണക്കനുസരിച്ച്, 2016 നും 2017 നും ഇടയിലുള്ള ഒരു വര്‍ഷത്തെ കാലയളവില്‍ 20,000 നും 25,000 നും ഇടയില്‍ ഗര്‍ഭിണികളായ അമ്മമാര്‍ ബര്‍ത്ത് ടൂറിസത്തിനായി യുഎസിലേക്ക് യാത്ര ചെയ്തിട്ടുണ്ട്. 2025-ല്‍ അമേരിക്കയില്‍ 3.6 ദശലക്ഷം ജനനങ്ങളാണ് രേഖപ്പെടുത്തിയത്.

‘ജനനാവകാശ പൗരത്വത്തെക്കുറിച്ച് സുപ്രീം കോടതിയില്‍ നിന്ന് വളരെ നിര്‍ഭാഗ്യകരമായ ഒരു തീരുമാനമാണ് ഉണ്ടായത്. അത് വളരെ അടുത്ത തീരുമാനമായിരുന്നു, പക്ഷേ വളരെ നിര്‍ഭാഗ്യകരമായ ഒന്നായിരുന്നു,’ ട്രംപ് പറഞ്ഞു. ‘ആളുകള്‍ ഇതിനെ ചുറ്റിപ്പറ്റി ബിസിനസ്സുകള്‍ കെട്ടിപ്പടുക്കുകയാണ്. കാര്യങ്ങള്‍ നടക്കേണ്ട രീതി ഇതല്ല. ഇതൊരു നാണക്കേടാണ്. അവര്‍ പണം നല്‍കി ഉള്ളിലേക്ക് വഴിയുണ്ടാക്കുകയാണ്, ഞങ്ങള്‍ അതിന് അനുവദിക്കില്ല,’ അദ്ദേഹം കൂട്ടിച്ചേര്‍ത്തു. പൗരത്വ വ്യവസ്ഥ വ്യത്യസ്തമായ ഒരു ചരിത്ര പശ്ചാത്തലത്തിലാണ് അംഗീകരിച്ചതെന്നും ട്രംപ് വാദിച്ചു.

2025-ല്‍ അധികാരത്തില്‍ തിരിച്ചെത്തിയ ആദ്യ ദിനത്തില്‍ ട്രംപ് ഒപ്പുവെച്ച മുന്‍ എക്‌സിക്യൂട്ടീവ് ഉത്തരവ്, മാതാപിതാക്കളില്‍ ആരെങ്കിലും ഒരാള്‍ അമേരിക്കന്‍ പൗരനോ നിയമപരമായ സ്ഥിര താമസക്കാരനോ അല്ലെങ്കില്‍ യുഎസില്‍ ജനിക്കുന്ന കുട്ടികള്‍ക്ക് സ്വയമേവയുള്ള പൗരത്വം നിഷേധിക്കാന്‍ ലക്ഷ്യമിട്ടുള്ളതായിരുന്നു. എന്നാല്‍ ആ ശ്രമം ഭരണഘടനാ വിരുദ്ധമാണെന്ന് വിധിച്ച സുപ്രീം കോടതി, 14-ാം ഭേദഗതിയുടെ ദീര്‍ഘകാലമായുള്ള വ്യാഖ്യാനങ്ങള്‍ വീണ്ടും ശരിവെക്കുകയായിരുന്നു. രാജ്യത്തുള്ള ഓരോ സ്വതന്ത്ര പൗരനും പൗരത്വം വ്യാപകമായി ഉറപ്പാക്കാനാണ് ഈ ഭേദഗതിയുടെ ശില്പികള്‍ ഉദ്ദേശിച്ചതെന്ന് കോടതിക്ക് വേണ്ടി വിധിന്യായം എഴുതിയ ചീഫ് ജസ്റ്റിസ് ജോണ്‍ റോബര്‍ട്ട്‌സ് വ്യക്തമാക്കിയിരുന്നു.

ബര്‍ത്ത് ടൂറിസത്തെ വ്യക്തമായി നിരോധിക്കുന്ന നിയമങ്ങളൊന്നും യുഎസില്‍ നിലവിലില്ലെങ്കിലും, ട്രംപിന്റെ ആദ്യ ഭരണകാലത്ത് 2020-ല്‍ അവതരിപ്പിച്ച ഫെഡറല്‍ ചട്ടങ്ങള്‍, കുട്ടികള്‍ക്ക് യുഎസ് പൗരത്വം നേടുക എന്ന പ്രാഥമിക ലക്ഷ്യത്തോടെ ടൂറിസ്റ്റ് അല്ലെങ്കില്‍ ബിസിനസ് വിസകള്‍ ഉപയോഗിക്കുന്നത് തടയുന്നുണ്ട്. ബര്‍ത്ത് ടൂറിസം പദ്ധതികളില്‍ ഉള്‍പ്പെടുന്നവര്‍ക്ക് തട്ടിപ്പിനോ അനുബന്ധ കുറ്റകൃത്യങ്ങള്‍ക്കോ നിയമനടപടികള്‍ നേരിടേണ്ടി വരികയും ചെയ്യാം.