പത്തനംതിട്ട: പ്രളയബാധിത മേഖലകളിൽ ദുരിതാശ്വാസ പ്രവർത്തനങ്ങളിൽ ഏർപ്പെട്ട ജീപ്പിന് പിഴയീടാക്കിയ മോട്ടോർ വാഹന വകുപ്പ് (എംവിഡി) ഉദ്യോഗസ്ഥനെതിരെ വകുപ്പുതല നടപടി. അടൂർ സ്ക്വാഡിലെ അസിസ്റ്റന്റ് മോട്ടോർ വെഹിക്കിൾ ഇൻസ്പെക്ടർ ലൈജുവിനെയാണ് അന്വേഷണ വിധേയമായി സസ്പെൻഡ് ചെയ്തത്.
ആറന്മുളയിലെ വെള്ളപ്പൊക്കത്തിൽ അകപ്പെട്ടവരെ സുരക്ഷിത കേന്ദ്രങ്ങളിലേക്ക് മാറ്റാൻ യൂത്ത് കോൺഗ്രസ് പ്രവർത്തകർ കൊണ്ടുവന്ന ഓഫ് റോഡ് വാഹനത്തിനാണ് എംവിഡി ഉദ്യോഗസ്ഥൻ പിഴയിട്ടത്. വാഹനത്തിന്റെ മുന്നിൽ അധികമായി ഘടിപ്പിച്ചിരുന്ന ലൈറ്റുകൾ ചൂണ്ടിക്കാട്ടിയായിരുന്നു നടപടി. മെഴുവേലി സ്വദേശിയായ വാഹന ഉടമയുടെ പേരിലാണ് പിഴ നോട്ടീസ് വന്നത്.
ഈ നടപടിക്കെതിരെ ആറന്മുള എംഎൽഎ അബിൻ വർക്കി നേരിട്ട് ഗതാഗത മന്ത്രിക്ക് പരാതി നൽകിയിരുന്നു. ഇതിന്റെ അടിസ്ഥാനത്തിലാണ് ഗതാഗത വകുപ്പ് ഉടനടി സസ്പെൻഷൻ ഉത്തരവിറക്കിയത്. എംഎൽഎയുടെ നിർദേശപ്രകാരം യൂത്ത് കോൺഗ്രസ് പ്രവർത്തകർ തന്നെയാണ് പിന്നീട് പിഴയൊടുക്കിയത്.
Be the first to comment