കോട്ടയം: മീനച്ചിലാറ്റിലൂടെ കുതിച്ചെത്തിയ പ്രളയജലം കോട്ടയത്തിന്റെ പടിഞ്ഞാറന് മേഖലയെ വെള്ളത്തില് മുക്കി. ജില്ലയുടെ താഴ്ന്ന പ്രദേശങ്ങളെല്ലാം വെള്ളത്തിലായിരിക്കുകയാണ്. പലയിടത്തും ഗതാഗതം മുടങ്ങി. രണ്ടായിരത്തോളം കുടുംബങ്ങളെ ക്യാമ്പിലേക്ക് മാറ്റി.
നടന്നുപോകവേ വെള്ളക്കെട്ടില് വീണ് ആറുമാനൂര് സ്വദേശിയും മണര്കാട് പറമ്പുകരയില് മധ്യവയസ്കനും മരിച്ചത് ഇന്നലത്തെ സങ്കടവാര്ത്തയായി. ഇതോടെ ജില്ലയില് മഴക്കെടുതിയില് മരിച്ചവരുടെ എണ്ണം ആറായി. പ്രളയത്തില് ഈരാറ്റുപേട്ടയിലെയും പാലായിലെയും നൂറുകണക്കിനു വ്യാപാരികള്ക്ക് വലിയ നാശമാണുണ്ടായിരിക്കുന്നത്. പടിഞ്ഞാറന് മേഖലയിലെയും നിരവധി വ്യാപാരികള്ക്ക് നഷ്ടമുണ്ട്.
നെല്ല്, പച്ചക്കറി, കപ്പ്, വാഴ, ജാതി തുടങ്ങി കാര്ഷിക മേഖലയിലും വലിയ നഷ്ടമാണുണ്ടാക്കിയിരിക്കുന്നത്. പലയിടത്തും മടവീഴ്ചയുമുണ്ട്. മീനച്ചില്, മണിമല, മൂവാറ്റുപുഴയാറുകളില് ജലനിരപ്പ് അപകടകരമായ രീതിയില് തുടരുകയാണ്. ഉരുള്പൊട്ടലുണ്ടായ മലയോരത്ത് ഇന്നലെ മഴയ്ക്കു ശമനമുണ്ടായി. മണ്ണിടിച്ചിലുണ്ടായ പല റോഡുകളിലും ഇപ്പോഴും ഗതാഗതം സുഗമമായിട്ടില്ല. പെരിങ്ങുളം പൂഞ്ഞാര് തെക്കേക്കര പ്രദേശത്ത് പലകുടുംബങ്ങളും ഇപ്പോഴും ഒറ്റപ്പെട്ടു കഴിയുകയാണ്.
Be the first to comment