ഔദ്യോഗിക സന്ദർശനത്തിനായി ഇന്തോനേഷ്യയിലെത്തിയ ഇന്ത്യൻ പ്രധാനമന്ത്രി നരേന്ദ്ര മോദിക്ക് രാജ്യത്തെ പരമോന്നത സിവിലിയൻ ബഹുമതിയായ ‘ബിന്താങ് റിപ്പബ്ലിക് ഇൻഡോനേഷ്യ അദിപൂർണ്ണ’ (Bintang Republik Indonesia Adipurna) സമ്മാനിച്ചു. ജക്കാർത്തയിലെ പ്രസിഡൻഷ്യൽ കൊട്ടാരത്തിൽ നടന്ന പ്രൗഢഗംഭീരമായ ചടങ്ങിൽ ഇന്തോനേഷ്യൻ പ്രസിഡന്റ് പ്രബോവോ സുബിയാന്തോയാണ് ബഹുമതി കൈമാറിയത്. ഇരുരാജ്യങ്ങളും തമ്മിലുള്ള ഉഭയകക്ഷി ബന്ധവും തന്ത്രപ്രധാനമായ സഹകരണവും ശക്തമാക്കുന്നതിൽ മോദി നൽകിയ സംഭാവനകൾ പരിഗണിച്ചാണ് പുരസ്കാരം.
ഏറ്റവും കൂടുതൽ മുസ്ലീം ജനങ്ങൾ ഉള്ള രാജ്യമായ ഇന്തോനേഷ്യ ജനസംഖ്യയുടെ കാര്യത്തിൽ ലോകത്തെ നാലാമത്തെ രാജ്യമാണ്. ഏഴാം നൂറ്റാണ്ട് മുതൽക്ക് ഇന്ത്യ , ചൈന എന്നീ രാജ്യങ്ങളുമായിട്ടായിരുന്നു പ്രധാന കച്ചവട ബന്ധം. ഇൻഡോനേഷ്യയിലെ ഒരു ദ്വീപ് ആയ ബാലിദ്വീപിൽ ഇപ്പോഴും ഹിന്ദു സംസ്ക്കാര രീതികളാണ് പിന്തുടരുന്നത്.
ഇന്ത്യയും ഇന്തോനേഷ്യയും തമ്മിലുള്ള ആഴമേറിയ സാംസ്കാരിക ബന്ധത്തിന്റെയും തകർക്കാനാകാത്ത തന്ത്രപ്രധാനമായ വിശ്വാസത്തിന്റെയും തെളിവാണ് ഈ പരമോന്നത ബഹുമതിയെന്ന് സംയുക്ത വാർത്താസമ്മേളനത്തിൽ പ്രസിഡന്റ് പ്രബോവോ സുബിയാന്തോ പറഞ്ഞു. 1959-ൽ സ്ഥാപിതമായ ഈ പുരസ്കാരം രാജ്യത്തിന്റെ ഐക്യത്തിനും അഭിവൃദ്ധിക്കും മികച്ച സംഭാവനകൾ നൽകുന്നവർക്കും, ഇന്തോനേഷ്യയുമായുള്ള സൗഹൃദം ദൃഢമാക്കുന്ന വിദേശ ഭരണത്തലവന്മാർക്കുമാണ് നൽകാറുള്ളത്.
ആദരവിന് നന്ദി രേഖപ്പെടുത്തിയ പ്രധാനമന്ത്രി നരേന്ദ്ര മോദി ഈ പുരസ്കാരം കോടിക്കണക്കിന് വരുന്ന ഇന്ത്യൻ ജനതയ്ക്ക് സമർപ്പിക്കുന്നതായി പ്രഖ്യാപിച്ചു. 2018-ൽ ഇരുരാജ്യങ്ങളും തമ്മിൽ ആരംഭിച്ച സമഗ്ര തന്ത്രപ്രധാന പങ്കാളിത്തം ഇപ്പോൾ പുതിയ ഉയരങ്ങളിലാണെന്നും വികസനം, സുരക്ഷ, സാങ്കേതികവിദ്യ, സംസ്കാരം, വിദ്യാഭ്യാസം തുടങ്ങിയ എല്ലാ മേഖലകളിലും ഇരുരാജ്യങ്ങളും വലിയ മുന്നേറ്റമാണ് നടത്തുന്നതെന്നും അദ്ദേഹം കൂട്ടിച്ചേർത്തു.
ത്രിരാഷ്ട്ര സന്ദർശനത്തിന്റെ ഭാഗമായി തിങ്കളാഴ്ചയാണ് പ്രധാനമന്ത്രി ഇന്തോനേഷ്യയിൽ എത്തിയത്. ഇന്തോനേഷ്യൻ വ്യോമസേനയുടെ യുദ്ധവിമാനങ്ങളുടെ അകമ്പടിയോടെയാണ് പ്രധാനമന്ത്രിയുടെ വിമാനത്തെ ആകാശപരിധിയിലേക്ക് സ്വീകരിച്ചത്. തുടർന്ന് കൊട്ടാരത്തിൽ കുതിരപ്പടയാളികളുടെയും പരമ്പരാഗത കലാപ്രകടനങ്ങളുടെയും അകമ്പടിയോടെ ഗാർഡ് ഓഫ് ഓണർ നൽകി അദ്ദേഹത്തെ വരവേറ്റു.
സന്ദർശനത്തിനിടയിൽ ഇരുരാജ്യങ്ങളും തമ്മിലുള്ള ബ്രഹ്മോസ് മിസൈൽ കരാറിൽ നിർണായക പുരോഗതി ഉണ്ടാകുമെന്നാണ് വിലയിരുത്തൽ. കൂടാതെ, ഇന്തോനേഷ്യയിലെ ഏറ്റവും വലിയ ഹൈന്ദവ ക്ഷേത്രസമുച്ചയമായ യോഗ്യകർത്തയിലെ പ്രാംബനൻ ക്ഷേത്രവും പ്രധാനമന്ത്രി സന്ദർശിക്കും. തുടർന്ന് അദ്ദേഹം ഇന്ത്യൻ പ്രവാസികളുമായും സംവദിക്കും. ജൂലൈ 8 വരെയാണ് പ്രധാനമന്ത്രിയുടെ ഇന്തോനേഷ്യൻ സന്ദർശനം.
Be the first to comment