തെരഞ്ഞെടുപ്പിൽ ജനങ്ങൾക്കല്ല വീഴ്ച സംഭവിച്ചതെന്ന് തോമസ് ഐസക്ക്

കോഴിക്കോട്: തെരഞ്ഞെടുപ്പിൽ ജനങ്ങൾക്കല്ല വീഴ്ച സംഭവിച്ചതെന്നും ജനങ്ങളെ ബോധ്യപ്പെടുത്തി പാർട്ടിക്കൊപ്പം കൊണ്ടുവരാൻ സാധിക്കാത്തത് പാർട്ടിയുടെ വീഴ്ചയാണെന്നും മുതിർന്ന സിപിഎം നേതാവ് തോമസ് ഐസക്ക്.

കോഴിക്കോട്ട് ഞായറാഴ്ച ആരംഭിച്ച മൂന്നു ദിവസത്തെ സിപിഎം വിശാല സംസ്ഥാന സമിതി യോഗത്തിന് മുന്നോടിയായി മാധ്യമങ്ങളോട് സംസാരിക്കുകയായിരുന്നു അദ്ദേഹം. കഴിഞ്ഞ മൂന്നുമാസമായി പാർട്ടിയുടെ എല്ലാതലങ്ങളിലും അടിത്തട്ട് വരെ എന്തുകൊണ്ടാണ് തിരിച്ചടിയുണ്ടായതെന്നും ഇത്രയും നല്ല ഭരണമുണ്ടായിട്ടും ജനം എതിരായതെന്തുകൊണ്ടെന്നും വിശദമായി ചർച്ച ചെയ്തിട്ടുണ്ടെന്ന് അദ്ദേഹം പറഞ്ഞു.

ഇനി ഇതെല്ലാം ആവർത്തിച്ചുപറയാനല്ല സംസ്ഥാന സമിതി ചേരുന്നതെന്നും രാഷ്ട്രീയവും ഭരണപരവും സംഘടനാപരവുമായ വീഴ്ചകൾ തിട്ടപ്പെടുത്തി അവ ഇനി ആവർത്തിക്കില്ലെന്ന് ഉറപ്പുവരുത്താനുമുള്ള പ്രവർത്തന പരിപാടികൾക്ക് രൂപം നൽകാനാണ് ഈ വിശാല സമിതി ചേരുന്നതെന്നും തോമസ് ഐസക്ക് പറഞ്ഞു

നേതൃത്വത്തിലെ വീഴ്ചയെന്ത്, താഴെത്തട്ടിലെ ദൗർബല്യമെന്ത് എന്നിവയെല്ലാം ചർച്ച ചെയ്തുകഴിഞ്ഞുവെന്നും താൻ പറഞ്ഞതിൽ ഉറച്ചുനിൽക്കുന്നുവെന്നും അദ്ദേഹം വ്യക്തമാക്കി. തെറ്റുകൾ തിരുത്തിയെ മുന്നോട്ടുപോകാനാകൂ എന്നും തോമസ് ഐസക്ക് വ്യക്തമാക്കി.

Be the first to comment

Leave a Reply

Your email address will not be published.


*