സിഎംആർഎൽ – എക്സാലോജിക് സാമ്പത്തിക ഇടപാടിൽ പ്രതിപക്ഷ നേതാവ് പിണറായി വിജയനെതിരെ കേസെടുക്കാൻ നിർദേശം

സിഎംആർഎൽ – എക്സാലോജിക് സാമ്പത്തിക ഇടപാട് ആരോപണത്തിൽ പ്രതിപക്ഷ നേതാവ് പിണറായി വിജയനെതിരായ ഇഡിയുടെ കത്തിൽ കേസ് എടുക്കണമെന്ന് ഉന്നത പൊലീസ് ഉദ്യോഗസ്ഥർ നിർദേശിച്ചതായി റിപ്പോർട്ട്. ഇഡി കൈമാറിയ മൊഴികൾ തെളിവാക്കണമെന്നാണ് നിർദേശം നൽകിയിരിക്കുന്നത്. 

അഴിമതി നിരോധന നിയമപ്രകാരം കേസെടുക്കണമെന്നാണ് ഇവരുടെ നിലപാട്. വിജിലൻസ് അന്വേഷണം അഭികാമ്യമാണെന്നും പൊലീസ് വിലയിരുത്തുന്നുണ്ട്. അതേസമയം അന്വേഷണത്തിനായി പ്രത്യേക സംഘത്തിന് രൂപം നൽകാനാണ് സർക്കാർ ആലോചിക്കുന്നത്. ഈ വിഷയത്തിൽ ലഭിക്കുന്ന നിയമോപദേശത്തിൻ്റെ അടിസ്ഥാനത്തിലാകും സർക്കാർ തുടർ നടപടികൾ സ്വീകരിക്കുകയെന്നാണ് വിവരം.

ഇഡിയുടെ കത്തിൽ ഭരണകക്ഷിയായ കോൺഗ്രസാണ് പൂർണമായും വെട്ടിലായിരിക്കുന്നത് എന്നാണ് വിലയിരുത്തൽ. പ്രതിപക്ഷ നേതാവ് പിണറായി വിജയനെതിരെ കേസ് എടുത്താൽ സിപിഎം അത് വലിയൊരു ആയുധമാക്കുമെന്നാണ് കോൺഗ്രസിൻ്റെ ആശങ്ക. വിജിലൻസ് കേസ് എടുത്താൽ കേന്ദ്ര അന്വേഷണ ഏജൻസിയായ ഇഡിക്ക് വഴിയൊരുക്കലാകുമെന്ന വിമർശനവും ഇതിനോടകം പാർട്ടിക്കുള്ളിൽ നിന്നും പുറത്തു നിന്നും ഉയർന്നു കഴിഞ്ഞു. 

കേസെടുത്ത് അന്വേഷണം തുടങ്ങിയാൽ പിണറായി വിജയന് ദേശീയ തലത്തിൽ വലിയ പിന്തുണ ലഭിക്കുമെന്ന വിലയിരുത്തലും കോൺഗ്രസിനുള്ളിൽ നിന്ന് ഉയർന്നിട്ടുണ്ട്. ഇത് ‘ഇൻഡ്യ’ സഖ്യത്തിൽ വിള്ളൽ വീഴാൻ കാരണമാകുമെന്നും നേതൃത്വത്തിന് ആശങ്കയുണ്ട്.

ഈ സാഹചര്യത്തിൽ സംസ്ഥാന കോൺഗ്രസിനുള്ളിൽ വ്യത്യസ്ത അഭിപ്രായമാണ് ഉയർന്നുവന്നിട്ടുള്ളത്. തിരക്കിട്ട് കേസ് എടുക്കരുതെന്നാണ് ഒരു വിഭാഗം നേതാക്കൾ നിർദേശിച്ചിരിക്കുന്നത്. എന്നാൽ അതിവേഗത്തിൽ നടപടികളിലേക്ക് കടക്കണമെന്നാണ് മറുവിഭാഗത്തിൻ്റെ ആവശ്യം. 

വിഷയത്തിൽ മുഖ്യമന്ത്രി വിഡി സതീശനും ആശയക്കുഴപ്പത്തിലാണ് എന്നാണ് പുറത്തുവരുന്ന റിപ്പോർട്ടുകൾ. എല്ലാ വശങ്ങളും വിശദമായി പരിശോധിക്കാനാണ് മുഖ്യമന്ത്രിയുടെ നിർദേശം. വരാനിരിക്കുന്ന രാഷ്ട്രീയ പ്രത്യാഘാതങ്ങളും സർക്കാർ കൃത്യമായി വിലയിരുത്തും. വിഷയത്തിൽ ആഭ്യന്തരമന്ത്രി രമേശ് ചെന്നിത്തലയുടെ നിലപാടും നിർണായകമാകും.

Be the first to comment

Leave a Reply

Your email address will not be published.


*