ഡാറ്റാ സെന്ററുകൾക്കെതിരെ വ്യാജ പ്രചാരണം: എക്സിൽ നിന്ന് പുറത്തായത് 2 ലക്ഷം ചൈനീസ് ബോട്ട് അക്കൗണ്ടുകൾ

നിർമിത ബുദ്ധി സാങ്കേതികവിദ്യ അതിവേഗം വളർന്നുകൊണ്ടിരിക്കുകയും, ആ മേഖലയുമായി ബന്ധപ്പെട്ട വ്യവസായങ്ങൾ ശക്തിയാർജിക്കുകയും ചെയ്യുകയാണ്. എന്നാൽ യു.എസിന്റെ എ.ഐ. മുന്നേറ്റങ്ങളിൽ തടസ്സം സൃഷ്ടിക്കുന്നതിനായി ചൈനയിൽ നിന്ന് സംഘടിതമായ ശ്രമം നടക്കുന്നുണ്ടെന്ന് വെളിപ്പെടുത്തിയിരിക്കുകയാണ് സോഷ്യൽ മീഡിയ പ്ലാറ്റ്ഫോമായ എക്സ് (X). എ.ഐ. സാങ്കേതികവിദ്യകൾക്കും ഡാറ്റാ സെന്ററുകൾക്കുമെതിരെ വ്യാജ പ്രചാരണം നടത്തിയ ചൈനീസ് ബോട്ട് ശൃംഖല തങ്ങൾ തകർത്തുവെന്നാണ് എക്സിന്റെ വെളിപ്പെടുത്തൽ.

ഏകദേശം 2,00,000 വ്യാജ അക്കൗണ്ടുകൾ അടങ്ങുന്ന ഒരു വലിയ ശൃംഖലയാണ് എക്സ് കണ്ടെത്തി പൂട്ടിച്ചത്. ഇതിൽ 200 ഓളം അക്കൗണ്ടുകൾ എ.ഐ. ഡാറ്റാ സെന്ററുകൾക്കെതിരായ പ്രചാരണങ്ങളിൽ നേരിട്ട് പങ്കാളികളായിരുന്നുവെന്ന് കമ്പനി വ്യക്തമാക്കി.

എ.ഐ. ഡാറ്റാ സെന്ററുകൾ സാധാരണക്കാരായ ഉപഭോക്താക്കളുടെ വൈദ്യുതി നിരക്ക് വർധിപ്പിക്കുന്നുവെന്നും, അതിവേഗം വളരുന്ന ഡാറ്റാ സെന്ററുകൾ പവർ ഗ്രിഡിന് അമിതഭാരമുണ്ടാക്കുന്നുവെന്നും ഈ ബോട്ട് അക്കൗണ്ടുകളിലൂടെ പ്രചരിപ്പിച്ചു. വൻകിട കമ്പനികൾക്ക് സാധാരണക്കാർ സബ്സിഡി നൽകുന്നുവെന്ന വ്യാജ ആരോപണവും ഇവർ ഉന്നയിച്ചു. ഈ സന്ദേശങ്ങൾ കൂടുതൽ ജനങ്ങളിലേക്ക് എത്തിക്കാൻ കാർട്ടൂൺ രൂപത്തിലുള്ള ചിത്രങ്ങളും ഇവർ വ്യാപകമായി ഉപയോഗിച്ചിരുന്നു.

ആഗോളതലത്തിൽ ഡാറ്റാ സെന്ററുകളുമായി ബന്ധപ്പെട്ട് നിലനിൽക്കുന്ന പാരിസ്ഥിതിക ആശങ്കകളും എതിർപ്പുകളും മുതലെടുത്ത് എ.ഐ.യിൽ മേൽക്കൈ നേടാനുള്ള ചൈനീസ് ശ്രമങ്ങളുടെ ഭാഗമാണ് ഈ പ്രചാരണങ്ങളെന്ന് എക്സ് ആരോപിക്കുന്നു. യു.എസിലെ എ.ഐ. മുന്നേറ്റത്തിന് ആവശ്യമായ അടിസ്ഥാനസൗകര്യ വികസനത്തിന് തടസ്സങ്ങൾ സൃഷ്ടിക്കുകയും, അതുവഴി തദ്ദേശീയമായ എതിർപ്പ് വർധിപ്പിച്ച് എ.ഐ. രംഗത്ത് ചൈനയ്ക്ക് മേൽക്കൈ നേടുകയുമായിരുന്നു പ്രധാന ലക്ഷ്യമെന്ന് വിദഗ്ധർ വിലയിരുത്തുന്നു.

ഇലോൺ മസ്കിന്റെ ഉടമസ്ഥതയിലുള്ള എക്സിന്റെ സഹസ്ഥാപനമാണ് എ.ഐ. കമ്പനിയായ എക്സ്.എ.ഐ. (xAI). ഡാറ്റാ സെന്ററുകൾക്കെതിരായ വ്യാജ പ്രചാരണം കമ്പനിയുടെ വളർച്ചയ്ക്കും വെല്ലുവിളിയാണെന്നതിനാലാണ് ഇത്തരം പ്രചാരണങ്ങളെ തടയാനുള്ള സജീവമായ നടപടി എക്സ് സ്വീകരിച്ചത്. സമാനമായ രീതിയിൽ എ.ഐ. ഡാറ്റാ സെന്ററുകളെ ലക്ഷ്യമിട്ട് പ്രവർത്തിച്ചിരുന്ന ചൈനീസ് അനുകൂല സംഘത്തെ നേരത്തെ ഓപ്പൺ.എ.ഐ.യും കണ്ടെത്തി നിരോധിച്ചിരുന്നു.

Be the first to comment

Leave a Reply

Your email address will not be published.


*